Romu 14:8-19

⁸Na'ankure tasimuma eritama mani'nonana, Ramofonte nemanune. Hagi frunana Ramofonte nefrune. E'ina hu'negu frisuno, tasimu erita manisunana Rantimofo'za me'ne.

⁹E'i ama ana agafare, Kraisi'a friteno ete otino asimu erino manine. Hu'negu asimu erino mani'nea vahe'ene, fri'naza vahe'mokizmi Ra mani'ne.

¹⁰Hu'negu, nahigenka mono negafu amentintigura knare osu'ne hunka refako hunantane? Hifi nahigenka mono negafuna hufenkami netrane? Na'ankure ana maka'mota Anumzamo refako hurantesia tratera otigahune.

¹¹Na'ankure Mono Avontafepi amanage huno krentene, Ramo'a amanage nehie, tamage nasimu erina maninesnuge'za maka vahe'mo'za Nagrite zmarena neresageno, anamiko vahe'mo'za, huama hu'za Anumzamofona ragi amigahaze hu'ne. (Ais 45:23)

¹²Ana hu'neankita magoke magokemota Anumzamofona maka'zama nehuna zamofo kea asamigahune.

¹³E'ina hu'negu rumokizmima refko hunezmantona zana atreho. Tamagra'ma antahintahitamima retroma hanazana, mono neramafu zamentintifi zmagigo zamino, zamazeri tanafahu havegna huta omanisune hiho.

¹⁴Ranimo Jisasi'a eriama higena kena atahinama huana, mago'zamo'e huno agru osu'ne huta osugahune, magozamo agru osune hunkama antahisanana, e'i ana zamo'a kagritera agru osugahie.

¹⁵Hagi mago'a zama nenesana zankuma mono negafuma antahi havizama nehanigenka, kagra mago'ane avesi zampina nomanine. Atrenkeno nezama nesasazamo'a Kraisi'ma zamagrikuma huno fri'neamokizmia zmarimpa zamazeri haviza osino.

¹⁶Ana nehuta atrenke'za knare hune huta tamentinti nehanaza zankura, havizane hu'za osiho.

¹⁷Na'ankure Anumzamofo Kumara, neza ne'zane, ti nezana omanene. Hianagi Ruotge Avamupi fatgo avu'avazane, arimpa fru'zane, musenkase hu'za me'ne.

¹⁸Na'ankure iza'o Kraisima ama ana avu'avatetima avaririsimofona, Anumzamo'a muse hunetesigeno, vahe'mo'za nege'za hugnare huntegahaze.

¹⁹E'ina hu'negu atrenketa musezama mono kevufima fore'ma hanea zanku nehuta, tagra'ragara ozeri hankaveti, azeri hanaveti huta tamentintifina hageta ra hanune.