Rom 14:8-19

⁸Ning dala laun, dala laun sur a Leklek. Pa ning dala mat, dala mat sur a Leklek. I maining, ning dala laun o ning dala mat, dala anuna Leklek ot.

⁹E Karisito i mat pa i laun ulak, sur ir Leklek anunla ning la ka mat, pa anunla otleng ning la laun.

¹⁰Pa u, sur asaning u tiu e tasimlik? Sur asaning u oroi purpurum e tasimlik? Anasa dala rop dalar tur salanigo ana keskes na warkurai ane God.

¹¹Larning di ka tumus tari ting na Buk Tabu mang, “A Leklek i atongi mang, ‘Ning i momol a laun, a warwara otleng anuki i momol larne: A tarai rop lar kes ana bokona hanla salanigo tak, pa a tarai rop lar atong puasai mang iau e God.’”

¹²I maining, lamur dala rop taktakai dalar warwara talapor tetek e God ana ututnala rop ning dala ka tol tari.

¹³I maining gong ma dala artitiu artalai dala. Mulor nuknuk wakak sur gong mulo tol tar ta toltol ning ta tasimulo ir punga onoi.

¹⁴Ana nuk a lalaun ting na Leklek e Iesu, a tasman momoli mang bel ta utna na hangan ir asanan tar dala sur dalar laulau namatana e God. Ika, ning tik i nuki mang ir laulau namatana e God ning ir ien ta ngas a utna, i ot i tasmani mang bel i tostos teteki sur ir ieni.

¹⁵Ning u ien ta utna ning i aloklokron a nuknukna e tasimlik, bel u apuasa a toltol na marmaris. Gong u ien ta utna na hangan ning ir alaulau a tortorot anuna tik, ning e Karisito i mat suri.

¹⁶Ning u nuki mang ta utna i wakak, ika tik i atong laulaui, gong u toli.

¹⁷Anasa a matanitu ane God bel tagun a hangan pa gang. A matanitu ane God tagun a tostos a toltol, a bal molmol pa gasgas ana Talngan Tabu.

¹⁸Pa ning tik ir mur a toltolla ne ana nuna titol tetek e Karisito, e God ir gas onoi, pa a tarai otleng lar oroi lalani mang a toltol anunai i tostos.

¹⁹I maining dalar rakrakai kol sur dalar tol otnan a bal molmol, pa dalar arakrakai a tortorot anundala artalai.