Ruma 14:8-19

⁸su ko ogkabui ki pad, sakup ki rod to Lagboy no Igbuyag ta. No ko ogkamatoy ki, ogkounawa rod. Sikan ian, agad ogkabui kinow woy ko ogkamatoy kinow, sakup ki rod to Lagboy no Igbuyag ta.

⁹Omunaan ka nigpakimatoy si Hisu Kristu woy to nouyag on su oyow ogkohimu on sikandin no Lagboy no Igbuyag to tibo no otow no ogtuu, ko ogkabui pad kai to tano woy ko namatoy on.

¹⁰Nò, su sikan ian, og-inso a kaniu ko manio to duon otow dio to kaniu no ogdoisokon din ka nohimu on no sulod din to pogtuu ta, woy duon dod duma no ogsumansuman to madmaroyow ka kandin no batasan dio to tangkaan to Magboboot? Kono no litos ka sikan su uromo, tibo kinow ogpakasasindog dio to tangkaan to Magboboot no sikandin ka ogboboot tongod to tag sagboka kanta ko litos ka mgo batasan ta.

¹¹Ian su duon kinagian to Magboboot no ingkasulat dongan to, “Su sikanak ka Magboboot no kono ogkamatoy, tu-tuu ian ka ignangon ku kaniu to tibo no mgo otow, agad hontow, ogpakaluhud to tangkaan ku. Woy tibo ogpakanangon to kanak ian ka Magboboot.”

¹²No sikan ian to duon dod allow no tag sagboka kanta, ogpakanangon ki kandin to tibo no nohimu ta to kai ki pad to tano.

¹³Nò, sikan ian, og-awoson no oghagtong ki no ogsamili to duma ta ko loin ka pogtuman din to pogtuu rin. Di ian ta og-awoson to oyow ogtuud ki to oyow waro oghimuon ta no ogpakapasuwoy to duma ta no nigtuu.

¹⁴No pananglitan, su nasagboka a ki Hisus no Lagboy no Igbuyag ta, nakasabut a to waro agad nokoy no ngalap no kono ipakoon to Magboboot kanta. Di ko duon otow no ogpakaroromdom to kono no litos no ogkakoon din, ogkohimu on to kono oglitos kandin to ogkoon.

¹⁵Di ko ogkoon ka to ngalap no naan to duma nu no kono no litos no igpakoon, ogmasakit on ka goinawa rin no ogkounawa to ogdoisok ka goinawa nu kandin. Sikan ian to og-awoson no og-ayad-ayad ki to oyow, ka ogkoonon ta, kono ogkohimu no ian ogligkatan to pogkaraat to pogtuu to duma ta su ka pogpakimatoy ni Hisu Kristu, songo niglitos kandin.

¹⁶Nò, agad ko nataga ka to litos to Magboboot ko nokoy ka oghimuon nu, di ko duon duma nu no nahan din no kono oglitos, maroyow ko kono nu ro oghimuon su oyow ka oghimuon nu no maroyow, kono ogkohingaranan no maroot.

¹⁷Ian su, tongod to pogsugu to Magboboot kanta, waro pulus ko nokoy ka ogkakoon ta woy ko nokoy ka og-inumon ta. Di ian do duon pulus ko oghimu kinow on to maroyow dio to tangkaan to Magboboot, woy og-awoson to ogmaawang ka goinawa ta kandin woy to mgo duma ta, woy ko duon on igkarago ta no ogligkat to Gimukud to Magboboot.

¹⁸No ko sikan ka og-unugon ta no ogpaagad-agad kinow ki Hisu Kristu, ogkarago ka Magboboot kanta woy songo ogkarago ka mgo otow.

¹⁹Sikan ian to, ian ta ogpoomotan ka mgo batasan no ogpakabogoy to maawang no pog-ugpo ta woy ka ogpokohogot to goinawa tanow.