Romans 12:3-18

³Nil God.angan work inan theeꞌar ngay wik min nungantam inangan waaꞌ-waaꞌang niiyantana, puth nanpalan ngay niiyant maꞌmangkamantan thaw-thawanga: niiy-niiyaman ngaantam-ngeey-ngeeyāna. Nil puth God.angan pam wanch yot inangan kemp pok-pokkapang yump-yump ngampangana, ngamp puth kemp karpam keꞌ maka, yaꞌa — than pam wanch wiyiya, maꞌ-kunch iiy-iiyantan, wiyiya thaaꞌ-ay thaw-thawantan, than wiyangan kuchek waap min kal-kalantan, nil yimanamana. Niiy ngaantam-ngeey-ngeeyān work nil God.angan theeꞌ-theeꞌ niiyantana. Niiy ulp-ulpanangan keꞌ ngaantam-ngeey-ngeeyān niiyantakamana.

⁴In keꞌ yimanangan wunana: nil pamangan meeꞌ-a, kon-a, thaꞌ thakan kalan kemp nungantamangana. Than inangan workan iiy-iiyantan — nil meeꞌ nungantamangana yipam aak thath-thathow, nil kon nungantamangana yipama wik ngeey-ngeeyow, an thaꞌ nungantamangana yipam iiy-iiyow pal-puya. Thanana maꞌ-aath-aathwuntana.

⁵Yaa, inaniya aak yimanangan wunana: ngamp puth pam wanch Christians anangan-a, keꞌ kemp thonam nungantang anman iiy-iiyanamp, Jesus.antangana. Ngampiya work iiy-iiyanamp nungant, maꞌ-aath-aathwunampa.

⁶Ngampaniy work minam iiy-iiyāmpa, nil puth Ngeen-Wiy Min God.antamangan ngangk minangam work inangan theeꞌ-theeꞌ ngamparana. Than wiyanganiya wik min God.antaman waaꞌ-waaꞌantan ngamparana — yaa, thanan wik nungantaman waaꞌayn keꞌ nilam God.angan want ngamparana.

⁷Than wiyangana wiy anangan maꞌ-aath-aathantan thanang aak churchangan, pam wanch alpan thakan — yaa, thanana minam maꞌ-aath-aathayn thanangana; than wiyangana wik God.antaman koochanathantan thant, thanan min-minam thaaꞌ-aath-aathayn thanangana!

⁸Than pam wanch wiyangana ngangk thay-thayanathantan thanang wiy anangan Christ.an yipam monkan-wak-wakayn nunangana — thanana min-minam ngangk thay-thayanathayn thanangana. Than pam wanch wiyangan wukal thakan theeꞌ-theeꞌantan wiyantana — an than ngangk minangam theeꞌ-theeꞌayn thantana! Than wiyiya ministers iiy-iiyantan aꞌ putha than wiyiya manth-thayan churchakan iiy-iiyantana — puth thanana work minam anman iiy-iiyayn a! Than pam wanch wiyiya ngangk minangam iiy-iiyantan thant ngangk way anangan iiy-iiyantanana — thanana ngangk min anman yump-yumpayn thanangan a!

⁹Niiy kan-kanam paththam kaangk wun-wunān thanta pam wanch wiyantan, ngangk pal pekkuwamana. Niiy woyan wayakana man-mangkam theeꞌ-theeꞌāna; niiy keꞌ-ngoongkam anman woyan min anman wak-wakān a!

¹⁰Niiy kaangk wun-wunān niiyantakamana keꞌ niiy kuuncha kaath piip thonamam yimanangana; minam iiy-iiyān niiyantakamana, minam ngeey-ngeeywuna.

¹¹Niiy moom ngamparamana Lord.an ngangk minangam ngeey-ngeeyān nunangana nil want-wanttakan thaw-thawow niiyantana aꞌ niiy work keꞌ-ngoongkam iiy-iiyāna, keꞌ way-wayamāna.

¹²Ngangk minangam iiy-iiyāna, puth niiy kan meeꞌmiy nil God.angan ngulana kalow niiyang aak umpuyangam nungantang wun-wunāna. Aak waywey wampow niiyantan-a, niiyaniya ngangk thayanam iiy-iiyāna; puth inan thampa, niiy meeꞌ-wuth-wuthanamān nungant God.antana.

¹³Than Christians wiy anangan wukal keꞌanangan wun-wunaynan-a, puth may keꞌananganwey-a, niiyiy-a, may-a, putha wukal thakana theeꞌ-theeꞌān thanta; than pam wanch Christians aak nathpalan wampaynwey-a, yaa, niiyana min-minam piꞌ-piꞌān thananga.

¹⁴Than pam wanch anangan wayan iiy-iiyayn niiyantan-a, niiyana nungant God.antan meeꞌ-wuthanamāna minam yipam piꞌ-piꞌow thananga, niiy keꞌ thawān nungantana wayathow thanangana, yaꞌa.

¹⁵Than pam wanch ngangk minangamwey iiy-iiyaynan-a, niiyana ngangk minangam thamp iiy-iiyān thanttangana; puth than nath ngangk wayan wun-wunayn-a, peey-peeyaynwey-a, niiyan thaaꞌ-wakān thanang niiy thampana peeyān.

¹⁶Ngangk minangam iiy-iiyān niiyantakamana, minam thak piꞌ-piꞌwun, wik ulp-ulpanangan keꞌ thaw-thawāna, puth niiyan-a, ngurp min yumpwuna thanang anangan pam wanch yuk way min keꞌanangana. Niiy work piꞌanakan keꞌ wenk-wenkāna pam wanch piꞌan yipam waaꞌ-waaꞌayn niiyang, an yaꞌa, niiy keꞌ ngaantam-ngeey-ngeeyān niiyantakamana niiy keꞌ pam piꞌan yimanangana, an yaꞌa.

¹⁷Nil weeꞌang wayan yump-yumpow niiyantanwey-a, niiy puthangkan way nungantan keꞌ yumpāna; puth min anman iiy-iiyān than wiyangan yipam min waaꞌ-waaꞌayn niiyanga.

¹⁸Niiy ngangk minangam paththam iiy-iiyān pam wanch wiyantana, niiy keꞌ kul uw-uwān thant aak-yaꞌangana.