Rom 12:3-18

³Una marmaris anun o God, a watungi torom mot rop lena: Gong mot nuk ulabo pas mot ut. Mot in nuknuk wakak un mot, elar ut nama nurnur ra o God i sa pitar tari torom mot.

⁴Dat taktakai ara pinindat kut, ikut a susut na du pinindat ma anundet a pinapam kai ke elar.

⁵Lenkutkai lar dat, dat susut, ikut una pinin o Karisito dat takai kut. Dat taktakai dat tar pasano.

⁶Una marmaris anun o God i pitar tar a kum se etabor torom dat. Osi ra i pitar tar a etabor na wasiso na poropet toromi, i wakak sur in papam nami, elar nam anun a nurnur.

⁷Ma osi ra o God i pitar tar a etabor sur in tene warut, i wakak sur in warut a taro. Ma osi ra o God i pitar tar a etabor sur in tene ususer, i wakak sur in ususer a taro.

⁸Ma osi ra o God i pitar tar a etabor na ururagot tano, i wakak sur in uragot a taro nami. Ma osi ra o God i pitar tar a etabor sur in tene etabor, i wakak sur in palos lamano torom a taro. Ma osi ra o God i pitar tar a etabor sur in mugumugu, i wakak sur in papam dekdek sur in mugu wakak a taro. Ma osi ra o God i pitar tar a etabor sur in tene marmaris, i wakak sur in maris a taro nama gasgas.

⁹In wakak ra anumot a marmaris torom a taro in lingmulus. Mot in nget a sakino, ma mot in pam ukai a kum petutna ra i wakak.

¹⁰Mot in nem etetalai mot elar nami ra mot nem a kum tistisi mot. Mot in urur etetalai torom mot, ma gong mot nuk pas mot ut.

¹¹Mot in papam dekdek, ma gong a pinimot i ngoro. Mot in papam torom a Labino nama labino gasgas una balamot.

¹²Mot in kis langlang nama gasgas sur a kum utna ra numur a Labino in tabor mot nami. Ra mot etorom a kum mamaut, mot in tur dekdek, ma gong mot mana nama niaring.

¹³Ra a taro anun o God det sibo sur tu utna, mot in warut det. Mot in dekdek sur mot in gas pas a kum usiro.

¹⁴Ra a taro det ban laulau mot, mot in watung udan det, ma gong mot saring o God sur in ban laulau det.

¹⁵Ra a taro det gas, mot in gas tomo nam det. Ra det domos, mot in domos tomo nam det.

¹⁶Mot in tur tomo nama wakak na petutna etetalai torom mot. Gong mot nuk ulabo pas mot, mot in gas sur mot in kis tomo nama taro ra ka di ulabo pas a risandet. Ma gong mot nuki lena mot mananos doko.

¹⁷Gong mot balu a laulau ino nama laulau ino. Mot in nuknuk wakak sur mot in pam a petutna ra a taro det in tama lele i lena i tokodos.

¹⁸Ra i topas mot, mot in dekdek sur mot in kis na malmal nama taro rop.