3Beju Diusu ja ema ebia su ibuneba putsu, ema mesa quisaquisa puji ichatana. Da putsu, yama micuana jubida equisainia be ebia su aida mebatiji, Diusu ja metse su hue micuana sa tupu mesa tucheda tiatana putsu. Piba butsepi neje mepibatique cuaja Diusu ja metse su hue micuana tiatana.
4Pamapa ecuaneda piada equita nime, huamahuama dunejiji yani putsu. Equita sa pamapa tsapiapiati ai cuana yani. Yani equita sa ebai, eme, eid'aja, ehuatsi, muesumu. Daja da equita sa dueji ai cuana yani. Pamapa sa tsapiapiati mudu cuana yani.
5Daja huecha ecuaneda di, Cristo sa equita nime putsu. Metse su hue ecuaneseda tsapiapiati ai mudu yani biame, piada hue ecuaneda.
6Ecuana sa tupu teje Diusu ja ecuana tsapiapiati ai mudu cuana tiatana tu emebaja puji, cuaja mesa tsada epuani batame. Da putsu, tueda mudu quitaita cuana ecuaneseda saida a taji Diusu sa puji. Ahua quebata Diusu ja quisaquisa puji ichatana su, tu etiatani quisa saida cuana tuseda edue cuana saida quisaquisa a taji.
7Ahua quebata Diusu ja ilisha sa emebajaji ichatana su, tuseda puji saida pia cuana mebaja taji. Ahua quebata Diusu ja ebuetsuaji ichatana su, tuseda puji saida buetsua taji.
8Ahua quebata Diusu ja pia cuana nimetucheameji ichatana su, daja saida paata. Chipilu etiatani cuana sa saida neje tia taji aimue eturuca einatsu puji mahue. Ehuidusuji cuana sa jarejati neje huidusu taji. Tsahuataja cuana etsahuaji cuana sa beidaji neje tsahua taji.
9Edue cuana, huamahuama ibuneda mebaenitique. Be tsada mebaji ai madhada cuana. Ai saida cuana bahui meaque.
10Edue quitaita nime huamahuama ibuneda mebatique. Meiyubatique huamahuama. Daja huecha huamahuama d'eji metiatique.
11Be tunada mepuji. Echua Puji Jesucristo jubida memebajaque muesumu beidaji neje.
12Beidaji mepuque, Diusu peje su ebia su enimeid'uatiani putsu. Micuana tijetije yatani huecuana su, metucheatique. Be Cristo tije mearijiji. Daja hue Diusu memitsuderaque.
13Tsahuataja edue cuana metsahuaque. Saida mebatsuque micuana sa ete su ecuinatani cuana.
14Meibunebaque micuana neje madhada eputani cuana. Diusu mebajaque paibunebata huecuana puji. Be mimi madhada metiaji huecuana.
15Beidaji mepuque beidaji eputani cuana neje tupupai. Daja huecha mepaque epatani cuana neje.
16Saida neje huamahuama meanique. Be ebia su aida mebatiji. Nimemitsida cuana neje tupupai mepuniunetique. Be ebia su bahue eni mabatiji.
17Ahua pia cuana ja micuana madhada hue yatani su, be micuaneda di eturuca daja madhada meaji. Saida, butsepi neje cristiano cuana butse su mepuniunetique.
18Saida meanipad'iichaque pamapa cristiano cuana neje.
Romanos 12
Romanos 12:3-18