Romanos 12:3-18

³Jo̱ Fidiéeˇ nɨcacuøꞌrˊ jnea˜ co̱o̱ˋ ta˜ uíiꞌ˜ e lajo̱ calɨꞌiáangˋ dsíirˊ cajméerˋ có̱o̱ꞌ˜ jnea˜. Jo̱ co̱ꞌ lajo̱b cajméeˋguɨr, jo̱baꞌ fɨ́ɨˉɨ ꞌnʉ́ꞌˋ, dseaˋ rúꞌˋnaaꞌ dseaˋ quiáꞌˉ Dseaˋ Jmáangˉ, e jí̱i̱ꞌ˜ jaangˋ ꞌnʉ́ꞌˋ ꞌnéˉ niꞌɨ́ˆ áaˊnaꞌ e niingˉguɨ eáangˊ laco̱ꞌ jí̱i̱ꞌ˜ e catɨ́ɨngˉ niꞌɨ́ˆ áaˊnaꞌ cuaiñ˜ quíiˉnaꞌ. Co̱ꞌ ꞌnéˉ e niꞌɨ́ˆ áaˊnaꞌ jí̱i̱ꞌ˜ laco̱ꞌ catɨ́ɨmˉ lɨ́ꞌˆ laco̱ꞌ jí̱i̱ꞌ˜ tíiˊ e cangɨ́ɨngˋnaꞌ quiáꞌˉ Fidiéeˇ e jáꞌˉ lɨ́ɨngˋnaꞌ júuˆ quiáꞌrˉ.

⁴Dsʉco̱ꞌ lajaangˋ lajaangˋ jneaa˜aaꞌ seabˋ jminiˇnaaꞌ có̱o̱ꞌ˜guɨ loguáˆnaaꞌ jo̱guɨ e jiéꞌˋguɨ cajo̱, jo̱ laco̱o̱ˋ e jo̱ quíˉiiꞌ jmaquíimˊ ta˜ íingˆ laco̱o̱ˋ.

⁵Jo̱ lajo̱b lɨ́ɨˊ jneaa˜aaꞌ cajo̱, dseaˋ lɨ́ɨˊnaaꞌ dseaˋ quiáꞌˉ Dseaˋ Jmáangˉ, co̱ꞌ nañiˊ faꞌ fɨ́ɨmˊbaaꞌ eáangˊ, dsʉꞌ lafaꞌ jaamˋ dseaˋ lɨ́ɨˊnaaꞌ i̱ jáꞌˉ lɨ́ɨngˋ júuˆ quiáꞌˉ Dseaˋ Jmáangˉ. Jo̱ jaˋ eeˋ lɨ́ɨˊ lɨ˜ lɨ́ɨˊnaaꞌ jmaquíingˊ lajaangˋ lajaangˋnaaꞌ, dsʉꞌ lafaꞌ jaamˋ dseaˋ lɨ́ɨˊnaaꞌ lajaléngꞌˋnaaꞌ.

⁶Jo̱ e cuøꞌˊ Fidiéeˇ jneaa˜aaꞌ e iáangˋ dsíirˊ jmaquíimˊ nɨcangɨ́ɨngˋnaaꞌ lajaangˋ lajaangˋnaaꞌ. Jo̱baꞌ song nɨcacuøꞌrˊ jneaa˜aaꞌ e tɨɨˉnaaꞌ guiaˋnaaꞌ júuˆ quiáꞌrˉ fɨˊ quiniˇ dseaˋ jiéngꞌˋ, jo̱baꞌ lajo̱b ꞌnéˉ jmóˆooꞌ lɨ́ꞌˆ laco̱ꞌ jí̱i̱ꞌ˜ tíiˊ e nɨcangɨ́ɨngˋnaꞌ e jáꞌˉ lɨ́ɨˋnaaꞌ júuˆ quiáꞌrˉ.

⁷Jo̱guɨ song nɨcacuøꞌrˊ jneaa˜aaꞌ e nijméˆnaaꞌ ta˜ e nijmɨcó̱o̱ꞌ˜naaꞌ dseaˋ rúꞌˋnaaꞌ, jo̱baꞌ lajo̱b ꞌnéˉ jmóˆooꞌ. Jo̱guɨ song nɨcangɨ́ɨngˋnaaꞌ quiáꞌrˉ e tɨɨˉnaaꞌ e niꞌéꞌˆnaaꞌ dseaˋ rúꞌˋnaaꞌ júuˆ quiáꞌˉ Dseaˋ Jmáangˉ, jo̱baꞌ lajo̱b ꞌnéˉ jmóˆooꞌ jóng.

⁸Jo̱guɨ song nɨcangɨ́ɨngˋnaaꞌ quiáꞌrˉ e tɨɨˉnaaꞌ e nicuǿꞌˆnaaꞌ bíˋ dseaˋ rúꞌˋnaaꞌ, jo̱baꞌ lajo̱b ꞌnéˉ jmóˆooꞌ. Jo̱guɨ song nɨcangɨ́ɨngˋnaaꞌ quiáꞌrˉ e nijmɨcó̱o̱ꞌ˜naaꞌ dseaˋ rúꞌˋnaaꞌ có̱o̱ꞌ˜ jaléꞌˋ e seaˋ quíˉnaaꞌ, jo̱baꞌ lajo̱b ꞌnéˉ jmóˆooꞌ e ngocángˋ dsiˋnaaꞌ. Jo̱guɨ song nɨcangɨ́ɨngˋnaaꞌ quiáꞌrˉ e ooˉnaaꞌ co̱o̱ˋ ta˜, jo̱baꞌ eáamˊ ꞌnéˉ e ñiing˜ dsiˋnaaꞌ e nijmóˆnaaꞌ e ta˜ jo̱. Jo̱guɨ song nɨcangɨ́ɨngˋnaaꞌ quiáꞌˉ Fidiéeˇ e nijmɨcó̱o̱ꞌ˜naaꞌ jaléngꞌˋ dseaˋ rúꞌˋnaaꞌ i̱ li˜ ꞌnéˉ quiáꞌˉ lajo̱, jo̱baꞌ lajo̱b ꞌnéˉ jmóˆooꞌ e iáangˋ dsiˋnaaꞌ.

⁹Jo̱ fɨ́ɨˉguɨ́ɨ ꞌnʉ́ꞌˋ, dseaˋ rúꞌˋnaaꞌ dseaˋ quiáꞌˉ Dseaˋ Jmáangˉ, dseángꞌˉ e ngocángˋ óoˊbaꞌ ꞌnéˉ nijmiꞌneáangˋnaꞌ dseaˋ rúngꞌˋnaꞌ, jo̱ o̱ꞌ lɨ́ꞌˆ júuˆ e fóꞌˋnaꞌ e jmooˋnaꞌ lajo̱. Jo̱guɨ ꞌnéˉ e ꞌníꞌˋ máamˊbaꞌ jaléꞌˋ e jaˋ dseengˋ, co̱ꞌ lɨ́ꞌˆ lɨˊ dseángꞌˉ jí̱i̱ꞌ˜ e guiʉ́ˉbaꞌ ꞌnéˉ nijméeˆnaꞌ.

¹⁰Jo̱guɨ jmiꞌneáangˋnaꞌ dseaˋ rúngꞌˋnaꞌ lɨ́ꞌˆ laco̱ꞌguɨ catɨ́ɨngˉ e jmóoˋ dseaˋ quiáꞌˉ Dseaˋ Jmáangˉ, jo̱guɨ nijmɨꞌgooˋ rúngꞌˋnaꞌ cajo̱.

¹¹Jo̱ jaˋ ꞌnéˉ jméeˆnaꞌ fɨ́ngꞌˉnaꞌ, co̱ꞌ lɨ́ꞌˆ lɨˊ ꞌnéˉ e nicuǿꞌˆ bíˋ yaang˜naꞌ e nijméeˆnaꞌ jaléꞌˋ ta˜ e nɨcangɨ́ɨngˋnaꞌ quiáꞌˉ Fidiéeˇ.

¹²Jo̱ e iáangˋ óoˊbaꞌ ꞌnéˉ seengˋnaꞌ laꞌeáangˊ e dseángꞌˉ nɨtab˜ óoˊnaꞌ e nilɨseemˋbaꞌ cøøngˋ có̱o̱ꞌ˜ Fidiéeˇ fɨˊ ñifɨ́ˉ quiáꞌrˉ mɨ˜ nitɨ́ˉ e íꞌˋ jo̱. Jo̱guɨ ꞌnéˉ e jméeˆnaꞌ féngꞌˊ óoˊbaꞌ có̱o̱ꞌ˜ jaléꞌˋ fɨꞌíˆ dsíiˊ e dsingɨ́ɨngˉnaꞌ, jo̱guɨ cajo̱ jaˋ ꞌnéˉ tʉ́ˆnaꞌ e fǿngꞌˋnaꞌ Fidiéeˇ.

¹³Jo̱ jaléngꞌˋ dseaˋ rúngꞌˋnaꞌ dseaˋ quiáꞌˉ Dseaˋ Jmáangˉ i̱ li˜ seaˋgo̱ fɨꞌíˆ dsíiˊ quiáꞌˉ, jo̱baꞌ ꞌnéˉ e nijmɨcó̱o̱ꞌ˜baaꞌre jóng. Jo̱guɨ íingꞌ˜naꞌ có̱o̱ꞌ˜ júuˆ røøˋ jaléngꞌˋ dseaˋ i̱ guilíingˉ fɨˊ quíiˉnaꞌ.

¹⁴Jo̱guɨ mɨ́ɨꞌ˜naꞌ Fidiéeˇ co̱o̱ˋ e guiʉ́ˉ uíiꞌ˜ quiáꞌˉ jaléngꞌˋ dseaˋ i̱ jmángꞌˋ ꞌnʉ́ꞌˋ gaˋ, jo̱ dseángꞌˉ lajo̱b ꞌnéˉ jméeˆnaꞌ có̱o̱ꞌr˜ jo̱guɨ jie˜ mɨ˜ fóꞌˋnaꞌ júuˆ ꞌlɨꞌˆ uíiꞌ˜ quiáꞌrˉ.

¹⁵Jo̱ jmiꞌiáangˋ óoˊnaꞌ có̱o̱ꞌ˜ jaléngꞌˋ dseaˋ rúngꞌˋnaꞌ dseaˋ quiáꞌˉ Dseaˋ Jmáangˉ i̱ iáangˋ dsíiˊ, jo̱guɨ jmeeˉnaꞌ fɨꞌíˆ fɨng seengˋ i̱ lɨ́ɨngˊ lajo̱.

¹⁶Jo̱ røøbˋ ꞌnéˉ seengˋnaꞌ jee˜ laꞌóꞌˋ ꞌnʉ́ꞌˋ, dseaˋ lɨ́ɨngˊnaꞌ dseaˋ quiáꞌˉ Dseaˋ Jmáangˉ. Jo̱ jaˋ ꞌnéˉ e jmɨjløngꞌˆ yaang˜naꞌ, co̱ꞌ lɨ́ꞌˆ lɨˊ ꞌnéˉ e seengˋnaꞌ e røøbˋ lɨ́ɨngˊnaꞌ laco̱ꞌguɨ lɨ́ɨngˊ i̱ dseaˋ i̱ jaˋ jmɨjløngꞌˆ yaang˜ jee˜ jaléngꞌˋ ꞌnʉ́ꞌˋ. Jo̱guɨ jaˋ güɨꞌɨ́ˆ óoˊnaꞌ e dseángꞌˉ lɨ́ɨngˊnaꞌ dseaˋ i̱ tɨɨngˋ ngángꞌˋ.

¹⁷Jo̱ jaˋ jmooˋnaꞌ quɨꞌˊ táaˊ có̱o̱ꞌ˜ dseaˋ rúngꞌˋnaꞌ song eeˋgo̱ caꞌléerˊ quíiˉnaꞌ, co̱ꞌ ꞌnʉ́ꞌˋ ꞌnéˉ nijmɨꞌúungˋnaꞌ e nijméeˆnaꞌ dseángꞌˉ jmangꞌˉ e guiʉ́bˉ có̱o̱ꞌ˜ doñiˊ i̱i̱ˋ dseaˋ rúngꞌˋnaꞌ.

¹⁸Jo̱ jiéꞌˋ jí̱i̱ꞌ˜ cartɨˊ lɨ˜ quɨ́ɨꞌ˜naꞌ jmɨɨ˜ jmeeˉnaꞌ e nilɨseengˋnaꞌ juguiʉ́ˉ júuˆ røøˋ có̱o̱ꞌ˜ lajaléngꞌˋ dseaˋ rúngꞌˋnaꞌ.