Roma 12:3-18

³Tandà te pegsogò te Timanem kanak, doen den ipunù ko diyà te kedita niyo egpemenal. Ikà niyo egpelangkaw-langkaw. Meneng keilangan metòlid se aneng-aneng niyo tepad te mebatog niyo inangen tandà te kebiyasa imbegay te Timanem kenyo te pegsalig niyo diyà kandin.

⁴Pengkey medita se kinemoloan diyà te lawa te otaw, meneng netibok se kedita niyan diyà te sebad lawa, aw doen kekemowan te kedita te kinemoloan diyà te lawa.

⁵Iling heman kenyan, pengkey medita kidon egpemenal, meneng pegsebad tadon diyà ki Cristo, neinang kidon iling te lawa din amon megpetebangay kidon iling te pegpetebangay te menge kinemoloan diyà te lawa.

⁶Yan, so medita se kemolò te kebiyasa imbegay te Timanem diyà te teg sebad-sebad kenitadon tandà te tabang din, keilangan gemiten tadon iyan amon megpetebangay kidon. Aw binegayan kaw te Timanem te kebiyasa te pegkeliwat te kagi te Timanem, keilangan komeliwat kaw te kebenalan insalig din kenyo.

⁷Aw binegayan kaw te kebiyasa te pegtelaban, keilangan megtelaban kaw. Aw biyasa kaw egtoladà, keilangan megtoladà kaw.

⁸Aw biyasa kaw egpekagsen te pedowan te doma otaw egpemenal, yan se keilangan inangen niyo. Aw ibeg te Timanem memegay kaw diyà te doma otaw nelimahan, keilangan bowasag kaw kandan. Aw inangen kaw te Timanem pengolo diyà te doma otaw, keilangan measeb kaw te pegpengolo niyo. Aw isogò kaw te Timanem menabang te doma otaw nelidò, keilangan meluba se pedowan niyo te pegtabang niyo kandan.

⁹Aw keidowan niyo se doma otaw, keilangan melobos se pedowan niyo. Peg-eked kaw te medaet, meneng taking kaw ontò te mèpiya.

¹⁰Tandà te pegpesakop niyo diyà ki Cristo, neinang kaw den iling te telekedowa, aw yan keilangan megpedekelay kaw te pedowan. Keilangan meagka se pedowan te kedita niyo te pegpesegmanay.

¹¹Ikà niyo egketaka te pegtolò niyo te Pengolo tadon, meneng keilangan measeb kaw, aw keilangan magsen heman se pedowan niyo.

¹²Keilangan meluba kaw so doen egpelimanan niyo. Aw pemilangen kaw, pedeleg kaw te pegtaking niyo ki Cristo. Pedeleg kaw se pegtawal-tawal.

¹³Pegtabang kaw te menge doma sakop te Timanem nelimahan. Pegsagman kaw heman te menge otaw mepanaw.

¹⁴Pemoyò kaw diyà te Timanem te keidowan din se otaw egpemilang kenyo. Ikà niyo egpemoyò te detengan dan te medaet, meneng pegtawal-tawal kaw te keidowan din dan.

¹⁵Aw doen keluba te doma otaw, keilangan meluba kaw heman doma kandan. Aw doen kepuluk te doma otaw, keilangan mepuluk kaw heman doma kandan.

¹⁶Se kedita niyo migpesakop diyà ki Cristo, keilangan megsebad kaw te pedowan. Ikà niyo egpelangkaw-langkaw, meneng mèpiya aw megpeketagad kaw meg-inang te sagkep inang. Ikà niyo eg-aneng-aneng te sikiyo olò se netaga-taga te kebenalan.

¹⁷Pengkey doen otaw meg-inang te medaet diyà kenyo, ikà niyo eg-inang te medaet diyà kandan. Pegpekeaseb kaw meg-inang te ontò mèpiya eked silahi te doma otaw.

¹⁸Pegpekeaseb kaw te pegsebad te pedowan niyo diyà te kedita te doma otaw.