Odommu 12:3-18

³Nɛ̀ Kuyie nni ndɔ̀ɔ̀ mɛ̀ɛ̀ sɑ̀ɑ̀ nkpɛ́í nkɛ̀ n nɑɑ́ ku kó ditɔ̃nnì, n dɔ́ kɛ di nɑ́kɛ́ kɛ tú di yɛ̀mmɛ̀ bɑ́ ndò ndi dɛu kɛ pɛ̃ɛ̃tɛ́ di dommɛ̀. Kɛ̃́kùnnɛ dimɑ́ɑ̀ kɛ́yie nKuyie ndi duɔ́ nyɛ̀ɛ̀ fɔ̃̀tɛ̀.

⁴Wéntɛ́nɛ̀ onìtì mɔ̀kɛ mɛ̀ɛ̀ botí itùòti pɛ́u kɛ̀ i tɔ̃mmú cɑ̃́ɑ̃́ ncɑ̃́ɑ̃́.

⁵Tínti Kirisi kɔbɛ ti kpɛrɛ mɛ ndò, kɛ̀ ti sũ koò tɑ̀unɛ̀, ti wɛ̃ tikɔ̃̀ntì timɑ́ɑ̀ ndi, kɛ teé ntitɔbɛ̀.

⁶Bɑ́ wè kòo pɑ̃nnì cɑ̃̀ɑ̃́ nKuyie nhò pɑ̃ kɛ̀ dɛ̀ mɑ̀mɛ̀, kɛ̀ Kuyie nyɛ̃ nwèè duɔ́ nwè ku nɑ́ɑǹtì, wè nti nɑ̀ɑ́ nti tɑ̃́kùmɛ̀ dòmmɛ̀.

⁷Kɛ̀ Kuyie nyɛ̃ nwèè nteé mbɛtɔbɛ̀, wè mbɛ̀ teé, kɛ̀ kù yɛ̃ nwèè ntiè mbɛtɔbɛ̀, wè mbɛ̀ tiè.

⁸Kɛ̀ kù yɛ̃ nwèè nyɑ́úkùnko bɛtɔbɛ̀ kɔ̃̀ntì wè ntì yɑ́úkùnko, kɛ̀ kù duɔ́ nkɑ̀ɑ mɔ̀kɛ ɑ kpɛrɛ ɑ ḿpɑ̃ɑ̃ nnɛ̀ mɛyɛ̀mmɛ̀ mɛ̀mɑ́ɑ̀, kɛ̀ kù yɛ̃ nwèè nni bɛtɔbɛ̀ wè nni kɛ̀ dɛ̀ wenni, kɛ̀ kù yɛ̃ nwèè ńteé mbɛcĩ̀rìbɛ̀, wè mbɛ̀ teé nnɛ̀ diwɛ̀ì.

⁹Ndɔ́nɛ̀ ditɔbɛ̀ nɛ̀ timɔ́mmɔnti kɛ níí mmɛyɛi kɛ tɑunnɛ̀ dimɑ́ɑ̀ mɛsɑ̀ɑ̀ nteii.

¹⁰Ndɔ́nɛ̀ ditɔbɛ̀ díndi Kirisi kɔbɛ, kɛ́ndé ditɔbɛ̀.

¹¹Di bɑ́ ntú bɛtɔ̃nnɛ́díébɛ̀, di kɔ̃̀ntì ńyɑu kɛ̀ di mpĩ́ nti Yiɛ̀ ntɔ̃mmú kɛ̀ Muyɑɑ́nsɑ̀ɑ̀mù ndi teénnɛ̀.

¹²Dɛ̀ ndi nɑɑti di bɑɑ dɛ̀ kpɛ́í, kɛ̀ di fɛ̃́ũ̀rì di mmi kɛ bɑ́ɑ́ nKuyie nsɑ̃́ɑ̃̀.

¹³Nteénnɛ̀ di kɔbɛ Kirisi kɔbɛ dɛ̀mɑrɛ̀ bɛ̀ dónnì dìì mɔ̀nnì, kɛ́ncɔú bɛpɔ̀ɔ̀bɛ̀ nɛ̀ diwɛ̀ì.

¹⁴Kɛ̀ bɛ̀ di fɛ̃́ũnko di mbékú Kuyie nkó mɛsɑ̀ɑ̀ mbɛ kpɛ́í, di mbékú Kuyie nkó mɛsɑ̀ɑ̀ bɛ̀ɛ̀ di fɛ̃́ũnko bɛ kpɛ́í, di bɑ́ mbɛ̀ buɔ̀ nkusĩ̀nkù.

¹⁵Di níí ńwɛ̃ńnɛ̀ diwɛ̀ì bo bɛ̀ kɛ yɑ̃nku kɛ nwɛ̃ńnɛ̀ bɛ̀ɛ̀ kuɔ̀, nkɛ kuɔ̀.

¹⁶Nyonɛ̀ titɔbɛ̀ tú mù, di bɑ́ nhɑ̃ sifeé, nkɛ̃́kùnkonɛ̀ dimɑ́ɑ̀, di yɛ̀mmɛ̀ bɑ́ ndò di yɛ̃́ dɛmɔu.

¹⁷Di bɑ́ nfɔku mɛyɛi bɛ̀ɛ̀ mɛ̀ ndi dɔɔri. Ndɔɔrinɛ̀ dɛ̀ɛ̀ wenni kɛ̀ bɛ̀nìtìbɛ̀ bɛmɔu wúó.

¹⁸N dɔɔrinɛ̀ di bo nɑmɛ̀ kɛ́nnɑɑtinɛ̀ bɛnìtìbɛ̀ bɛmɔu.