Lom 12:3-18

³Gode ne daatnenea e okok olo omnebio kesoa elekiem olokiem ibo ne weng olo baabenamabibe. Ibo untako mo ngambianibta Ni naka sumobo ge funimibe! Ib bobol temo fumbianiba Ne Yesuse bainobo gabi ota Gode titilo ne omnebu ota omonita okok kebibo, ne nene titilo mo okok kebibabo ge funine!

⁴Nibo tekein kebuobe, nib damo olokiem otane o atosino homonobe. O okoko makobbabe, afet afetobe.

⁵Inaminobe, Klaiste bainobo galin nakaia unanga nibo homon otane nibo Yesuse tenanoba nib bobol tem funino makob am biob kesoa nibo makob e dam olokiemobe. Eka bainobo galin nakaia unanga nibo nib sinwalo daabesese biobo nib daayemin kukubo afet afet kesoa kukub olo makob nib damo atosino afet afeto ulabobe.

⁶Gode elekiem olokiem nibo daayebeo afet afet kesoa nib okoko titil osa afet afet omkayebebe. Nibo okoko Gode omyebio yota okok kemomo! Nakaia unangai wanita Gode Hobe wengo omye mole i kla motomaniba Weng olo Gode buk tem osa inang genobiobe genibta naka mak unang mak isa omyine! Eka temiba Gode buk temo inamin wengo blim bio mole weng olo naka mak unang maki mo omyaibe!

⁷Eka Gode naka make nakaia unangai daayemin okoko omale mole e nakaia unangai kla daayemeko! Eka Gode naka make aleyemin okok omale mole e aleyemin okoko kla okok kemeko!

⁸Eka Gode e okoko naka make omanea Kobo naka mak unang maki bobol tem funin ayamo omkayemale gene mole e okok olo kla okok kemeko! Eka Gode naka make okoko omanea Kobo inamin namino dloneba nakaia unangai inamin namino blimi dokayemale gene mole e okok olo kla okok kebianea nakaia unangai inamin namino homon dokayemeko! Eka Gode naka make okoko omanea Kobo naka mak unang maki kimanale gene mole e okok olo olota okok kemeko! Eka Gode naka make baabanea Keb nekwali dohalim bianeba daayemale ge baabane mole e seimbianea daayemeko!

⁹Ibo Ni bobol temo ni nekwali omyenoba gobenomo geib mole bain omyeniba gobeine! Ibo mo omyobobo genibta dim baanimibe! Ibo kukub misiamo ib nekwali omkayemin kukubo deibueine, o mo gobo nimibe! Ibo kukub olo deiboniba kukub ayam osa eka daayemin kukub osa ota kla wafueine!

¹⁰Ibo ib bobol temo bainobo galin naka mak unang maki omyeniba gobenomabibo makob nakae e bobol temo e dab tleminwali omyenea gobe bie inaine! Ibo naka mak unang maki mo baabenibta Ne naka ayamobo, ne okok osa ayamobo galaibe! Ibo hebmamsab naka mak unang maki niniin ota omfabesese nine!

¹¹Ibo Gode okoko okok kebibo tengo mo yemone! Gode Hobe ibo bekebe bianea daayebe kesoa ibte ete naniba Sume Gode okoko sbalma okok kemine!

¹²Gode ibo baabenea Yesus Klaiste imin tenea ibo dletnea moniba ne bibam ye unaniba amit nomabiobo genebio kesoa ibo e weng olo kla fumbianiba seinine! Enino ib dimo tam tlamo ibo sbal maniba amitie Gode nganhamine!

¹³Ibo ib nekwali bainobo gabibi maki afobeingo blim blibi daayemine! Eka bib mak nakai teniba ib bibamo tlaibo dleb taniba ib am tam daniba imeno doyine!

¹⁴Naka maki ibo kukub misiamo omyib mole ibo Gode baabaniba Naka eli daabenale ge baabaine! Ibo Gode mo baabanibta Naka eli yenaneba kaaine ge baabanimibe!

¹⁵Eka nakaia unangai seimbib mole ib tena seinine! Naka mak unang maki kukub misiamo i dimo tam tloa memib mole ib tena memine!

¹⁶Bainobo galin nakaia unanga ibo ib bobol tem funino makob aine! Ibo ilib untako mo ngambianibta Ni niniin sumobo galaibe! Ibo nakai niniin sumbai tenaniba makob haaine! Ibo mo funanibta Ni tekein kemino sumobo ge funimibe!

¹⁷Eka naka maki ibo kukub misiamo omyib mole ibo mo yang kenibta i kukub misiamo omyaibe! Ibo bobol temo kla fumbianiba nakaia unangai kin dimo okoko klayam ota okok kemine!

¹⁸Ibo awa genalin bobolo mo funimibe! Ibo besa gil bianiba fumbianiba Ni mo monobta naka maki mo tenanobta awao mo genaobe ge funine!