Roma 10:4-14

⁴Paana Keriso ia laugagaeo sigana ede, tausunusunuma gamagamagari bena se heduduraidi.

⁵Laulau‐dudurai, laugagaeo eai i tubuma, Mose i ribahasahasaida, i ene tau esau teina ginauri ta i ginauridi abo i mauri debadi eai.

⁶Na laulau‐dudurai sunuma eai i tubuma, i ene ina doha, “Tabu nuam eai u ene, ‘Eai abo i awasae galewa eai?’ (ia ede Keriso abo se woeadobeiyama),

⁷e ‘Eai abo i letadobi doubo eai?’” (ia ede Keriso mate eai abo se woeaisiniyama).

⁸Na i ene edoha? I ene, “Riba wa hanahanaum eai, awam eai eo nuam eai”: ia ede sunuma, ai lauguguiaei; (Deu. 30.12-14.)

⁹paana taba awam eai Iesu u wasawasaei u ene ia Guiau, eo nuam eai u nuatuwatai u ene Eaubada ia mate eai i hetorouioi, oa abo u mauri.

¹⁰Paana tau ma nuana i nuatuwatai i lau e laulau‐dudurai abo i tubu; eo awana eai hinage ia i wasawasaei arinai abo i mauri.

¹¹Uriuri tabuna eai si ene, “Ena tau esa, tau esa, ia i nuatuwatai taba nige i taumaeamaea. (Is. 28.16.)

¹²Iudea tauna eo Heleni tauna isi nige udodoi; paana Eaubada esegana mo gamagarida i tanuagaida, isi gamagaridi se eogalau ia arinai ia i ainauiadaoiedi.

¹³Tau esa, eo tau esa, se eogalau Guiau esana se atai, isi abo se mauri. (Ioela 2.32.)

¹⁴Na edohana abo tatao edi eogayogalau arinai, ena ia sora nige se ataataiwatai? Edohana abo edi ataataiena ena sora ia wasana nige se ataiei? Eo edohana edi ataiena ena nige enadi taulauguguia?