Rom 10:4-14

⁴Krais eterke Moses Reri Wule et legem. Tatame rem Krais rene omuteke habote, God re remne op wete. Kem areri tatame yenbo.

⁵Moses Reri Wule sen God re remne tatame yenbo webo tuma, Moses re op basrasem. Juda etemri wule tatame rem heyarwai sete, rem heyarwai sete, rem yaper wos be wuri nente, rem heyar somsom temente.

⁶Omuteke habon God re tatame yenbo webo tumak God Reri Siglow tuma op webo. Kem kworer mane op wemette. Yike Hevenke yaute? (Tuma tobo gwor. Yike Hevenke yawun Krais rene panen yerte?)

⁷Kem mane op habote. Yike gambo kwomke warte? Tuma tobo gwor. Yike gambo kwomke waren yin Krais rene panen wayete? Yike nemne God Reri Tuma wesowte?

⁸Omuteke habobo wule op webo. God Reri Tuma et kemne meknik tetane. Et keremri gwusi taulek tetane. Et keremri wuribaike tetane. (Lo 30:11-14) Er omuteke habobo wuleri tuma nem kemne op wesowbo.

⁹Kem kemri tumaske op wete. Jisas re Haneyen. Kem keremri wuribaike omuteke op habote. Jisas re sam, God re rene sele meike nenewayen wow sene newom. Kem etop wete, etop omuteke habote, God re kemne poten reri kwomke panen yite, kem pow tete tetane.

¹⁰Tatame rem remri wuribaike omuteke habobo, God re remne op webo. Kem ari tatame yenbo. Tatame rem op webo. Jisas re Haneyen. Op webo tatame remne God re poten reri kwomke panen yite, rem pow tete tetane.

¹¹God Reri Siglow tuma op webo. Aboi tatame rem Jisas rene omuteke habote, rem pap yaper be tete.

¹²Er tuma et Juda tatamekene Juda bo tatamekene remne kirkir webo. God re remne kena kena be nenbo. Haneyen re aboyei tatame etemri Haneyen. Rekene namrete tatame remne re heyarsubu nenbo.

¹³God Reri Siglow tuma op webo. Aboi tatame rem Haneyen Jisas rene op wete. Haneyen, ne anne kwobo late. Op wemetbo tatame, God re remne poten reri kwomke panen yite, rem pow tete tetane.

¹⁴Kem op habote. Jisas rene omuteke be habobo tatame rem Jisas rene mapurke wemette, re remne kwobo late? Jisas rene be sanetene tatame rem rene mapurke omuteke habote? God Reri Tuma remne be wesowtene, rem mapurke mette?