ROM 10:4-14

⁴Kale utamum. Moses imi ulo uyo Krais imi diim kota binimanu kupka-se kale, alugum unang tinum Krais imi ilak dolip iyo God iyo bogobe-nala, “Ibo tol kup unang tinum kelip o,” agan-nuuba ko.

⁵Moses iyo suuk kon uyo dola ko-nala e, unang tinum imi ulo waafulip God tebe bogobe-nala, “Ibo tol kup unang tinum o,” agan-kalin bomi sang uyo bogo-nala e, “Tam unang tinum iyo dok ita ulo kwep daa-sii uyo atin waafulip umdii, bilip iyo bomi diim ilep tiin kafan sinik uyo kulan-temip o,” agesa kale minte,

⁶God imi suuk kon tem uyo tinum God imi ilak dola kalaa age bogobe-nala, “Kabo tol tinum kelap o,” agan-kalin bomi sang uta bogo-nulu e, “Kalapmi aget tem uyo bogo-nalap, ‘Niyo tam abiil tigiin uyo no ota asok tolon o?’ agan-kalin ba o,” agesu kale, weng bomi magam uyo, “Tinum iyo dogobeta iit-nalata, Krais iyo dep malaak daa imi weng uyo tinangkaman-temaala o,” agesu kale,

⁷mungkup suuk kon tem uyo bogo-nulu e, “Kabo bogo-nalap, ‘Niyo tam begel am uyo tam o-nilita, asok tolon o,’ agan-kalin ba o,” agesu kale, weng bomi magam uyo, “Tinum iyo dogobeta no kaanamin imi abiip uyo no-nalata, Krais iyo dep mitam daa-nalata, imi weng uyo tinangkaman-temaala o,” agesu ko.

⁸Kale God imi suuk kon tem weng uyo intaben o agesu? Uyo? Bogo-nulu e, “God imi weng uyo atin kapmi diim uyo bomu, kapmi bon tem uyo bomu, kapmi aget tem uyo bomu o,” agesu ko. Kale God imi weng boyo numi Krais imi ilak dugamin sang unang tinum imi baga-em-nuubup uyo kulbu kale,

⁹kanube kabo weng kupkem daa bogo-nalap, “Yesus beyo God e minte nimi Kamogim no o,” age-nalap e minte, kapmi aget tem uyo atin utamapta, fen God iyo Yesus iyo begel ilet tem uyo dufo-se kalaa age no kelap umdii, bota God iyo kamdep meng daalan-tema kale,

¹⁰nuyo nulumi aget tem uyo utamupta, boyo aafen kalaa agan-bulupta, God iyo bogobe-nala, “Ipmi fengmin umi yuum uyo binimanebeluta, tol kup unang tinum kelip o,” agan-bom-nala e minte, numi Yesus imi ilak dugamin umi sang uta nulumi bon tem ilep kufu-bulupta, God iyo nuyo imdep meng daaga-bom no kem-nuuba ko.

¹¹Kale God imi suuk kon tem uyo Krais bemi sang uyo bogo-nulu, “Alugum waantap ita bemi ilak uyo dolip umdii, beyo tebe bilip iyo bisat imkalata, bilip imi aget uyo mafaganebelan-temaalu o,” agesu kale,

¹²Juda kasel so tinum miit maak maak so iyo God iyo tebe kuguup uyo maagup kup kupka-em-nuuba uta kale, alugum numi kamok iyo mungkup maagup kale, dok ita bemi ole-bom aman duga-emip umdii, beyo alugum bilip iyo i-filinin afaligen kup ke-bom-nalata, dong daga-e-boma kale,

¹³bomi sang uyo God imi suuk kon tem uyo bogo-nulu e, “Dogap ita Bisel iyo ole-bom aman duga-emip umdii, bilip iyo imdep meng ilami miit tem daalan-tema o,” agesu ko.

¹⁴Kuta kanube God iyo ilami weng kupka-emin tinum iyo maak imdala tilin-tem kelip umdii, bilip iyo dogobeta God imi weng uyo Juda kasel unang tinum iyo kupka-eman-temaalip ko. Minte kanube tinum maagup iyo maak tal God imi weng uyo kupka-emin-tem kema uyo, unang tinum iyo dogobeta God imi weng uyo tinangkaman-temaalip e minte, imi weng uyo tinangkulin-tem kelip umdii, dogobeta utamipta, fen Yesus beyo God kalaa agelan-temaalip ko. Kale mungkup bilip iyo utamipta, fen Yesus beyo God kalaa agelin-tem kelip uyo, dogobeta olabelan-temaalip ko. Kuta fen God iyo ilami weng kupka-emin tinum iyo imdala tal-nilipta, God imi weng uyo kupka-e-bilipta, Juda kasel iyo tinangkamsip kale, yak God imi suuk kon tem uyo bomi sang uyo bogo-nulu kano, “Tinum iyo weng tambal uyo kwep tal bogobela umdii, boyo atin tambaliim kuguup umdii kulbu o,” agesu ko.