Rom 2:4-16

⁴Anut uqa hina me bahic odihina odimei saen cecelac sumihina, odocob ameg me qee mahuc qee ihina. Anutna kobol me bahic eu ceteh gauc himec ec cisdogonafo? Anutna kobol me bahic eu hina wawin tului falicdocnu acahna eu hina qee dogonafa?

⁵Euqa hina wawin eu gagadic bahic odocob hina wawin qee tului falicdogona. Kobol eu odina hinana wadachec ameg me qee haudocwe magana. Odocob Anutna gemag bec camasac migian deelna uqana gesilec tutuc deel euna hinana wadachec ameg me qee ogan.

⁶Anut uqa “dana cunug agena odocnana gesiladimei ameg wadacadigian,” en.

⁷Leih age kobol me eu gagadic hewegina oodoig kobolkobolca ijanaga benca biluqagannuca cebac bilec qee mecwe qee eu megegina. Dana eu agenu Anut uqa cebac bilec gaid bileceb catanigian eu adigian.

⁸Odocob leih age agedodocnu himec cisdogina, odimeig mele je eu hibemdogina, odimeig kobol me qeena jic eu toodogina Anut uqa dana eundecnu gemag beceb ameg me qee bahicna wadacadigian.

⁹Culumen ben sogoecca eu dana kobol me qee odogina eundec cilehadigian. Juda dana age casac ocobil Juda dana qee eundec ageha oqagan.

¹⁰Euqa dana cunug age kobol me odogina eu Anut uqa kobolkobolca binan benca wawaga malol bilecca eu adigian. Juda dana eu age casac adeceb Juda dana qee eundec ageha adigian.

¹¹Ge, mele Anut uqa dana ijancanu cisdudu qee gesilina. Uqa dana cunug age ijanagacafo, qee ijanagaca qeefo ihocihoc cisdudu gesilina.

¹²Eu odi. Dana cunug age Mosesna loo je qee dodoig silail megina eu age loo je qee dodoig fadaloqagan. Odocob dana cunug age loo je dodoig qa silail megina eu Anut uqa loo jena gesiladigian.

¹³Dana age loo je gauc dah megina age Anut amegna ijanaga dana ititom qee. Dana loo je toodu odogina age dana ititom ijanaga eu oqagan.

¹⁴Juda dana qee eundec age Mosesna loo jeca qee, sihul euqa age leih loo je toodu odogina. Dana eu age loo jeca qee age odi odocobil agena toodu odoc eu agedodocna loo je cinigwe.

¹⁵Agena odocna loo jenu odoc Anut wawagana jaqen taweia eu camasac men. Odocob agena cisdoc silec ihulahal calena odocob saen leih kobol odogina eunu cois ec madeginafo, qee cois qee ec madeginafo.

¹⁶Eunu ija me je madigina euna deel osona hibna Anut uqa Jisas Krais umna dana cunug agena cisdoc jahunec nijina eu gesiladigian.