رْ مَ 2:4-16

⁴كَ عِ يٌشِ نّ عَلَ مَ بَ، عَ شَ قَنيِ نُن عَ شَ دِحّ نُن عَ شَ بْحّ بّشِ تٌ فبٌشِ؟ عِ مُ عَ كٌلٌن عَ عَلَ عَ شَ قَنيِ نَن مَسٍنمَ عِ بّ عَلَكٌ عِ شَ تُوبِ؟

⁵كْنْ عِ تٌ عِ تُلِ شْرْشْشِ، عِ تٌندِ تُوبِدٍ، عِ نَ عَلَ شَ شْنّ نَن نَفبٌقٍ عِ يّتّ شِلِ مَ كِيتِ سَ لْشْي، عَلَ شَ كِيتِ تِنشِنشِ مَكّنّنمَ تّمُي نَشّ.

⁶عَلَ كَنكَن شَ وَلِ سَرٍ قِمَ نّ.

⁷نَشٍيٍ عٍ تُننَبّشِ وَلِ قَنيِ رَبَقٍ مَ، عٍ شُننَكٍلِ، يِفِ، نُن كِسِ قٍن عَلَ رَ، عَلَ كِسِ قِمَ نّ عٍ مَ.

⁸كْنْ نَشٍيٍ عٍ يّتّ كّنّنقٍ تُن نَبَمَ، عٍ تٌندِ نْندِ نُن تِنشِنيِ رَ، عٍ بِرَ قٍ كٌبِ قْشْ رَ، عَلَ شَ شْنّ نُن فبَلٌي نَن تُن نَفَتَشِ عٍ بّ.

⁹حَشَنكَتّ نُن بْحّكَنّ نَن لُمَ عَدَ مَدِ بِرِن بّ نَشٍيٍ قٍ كٌبِ رَبَمَ، عَ قْلْ يُوِقِيٍ مَ، عَ سَ دْشْ سِ فبّتّيٍ رَ.

¹⁰كْنْ شُننَكٍلِ، بِنيّ، نُن بْحّسَ لُمَ مِشِ بِرِن بّ نَشٍيٍ قٍ قَنيِ رَبَمَ، عَ قْلْ يُوِقِيٍ مَ، عَ سَ دْشْ سِ فبّتّيٍ رَ،

¹¹بَرِ مَ عَلَ تَن مُ مِشِ يٌ رَقِسَ عَ بٌورٍ بّ.

¹²يُنُبِتْييٍ نَشٍيٍ بِرِن مُ عَلَ شَ سّرِيّ كٌلٌن عَننَبِ مُنسَ نَشَن قِشِ، عٍ بْنْمَ نّ، كْنْ عٍ مُ مَكِيتِمَ نَ سّرِيّ رَ. يُنُبِتْييٍ نَشٍيٍ سّرِيّ كٌلٌن عَننَبِ مُنسَ نَشَن قِشِ، عٍ تَن نَن مَكِيتِمَ نَ سّرِيّ رَ.

¹³نَشٍيٍ عٍ تُلِ مَتِمَ عَلَ شَ سّرِيّ رَ، نٍيٍ شَ مُ قِندِشِ تِنشِنتْييٍ رَ عَلَ يَ عِ. نَشٍيٍ عَلَ شَ سّرِيّ رَبَتُمَ، نٍيٍ نَن قِندِ مَ تِنشِنتْييٍ رَ.

¹⁴عَننَبِ مُنسَ مُ عَلَ شَ سّرِيّ سٌ سِ فبّتّيٍ يِ، نَشٍيٍ مُ قِندِ يُوِقِيٍ رَ. كْنْ عٍ نَ عَلَ شَ سّرِيّ رَبَتُ تّمُي نَشّ عٍ يّتّ حَنِفٍ مَ، عٍ بَرَ عَ كٌلٌن عَ لَنمَ عٍ شَ نَشَن نَبَ، هَلِ عٍ تٌ مُ عَلَ شَ سّرِيّ سْتْ.

¹⁵عٍ بَرَ عَ مَسٍن عَ عَلَ شَ سّرِيّ سّبّشِ عٍ بْحّ مَ. وٌن عَ كٌلٌن عَ نْندِ نَ عَ رَ بَرِ مَ عٍ شَشِلِ عٍ رَ سِمَ، «يِ حَنِفٍ مُ قَن،» شَ نَ مُ، «يِ حَنِفٍ نَن قَن.»

¹⁶عَ رَبَمَ نَ كِ نّ، عَلَ نّ كِيتِ سَمَ لْشْ نَشّ عَ شَ مِشِ سُفَندِشِ عِسَ سَابُي رَ، عَ مِشِيٍ فُندٌ بِرِن مَكِيتِ. ﭑ شِبَارُ قَنيِ نَشَن كَوَندِ مَ، عَ نَ نَن مَسٍنشِ.