RUUMIYA 2:4-16

⁴A/e boloc̱kina ris mii kun ta kum pa ma Arumgimis gi mo/en gun ishin ka enthus ki bwa mo ’taa? Dhali mmoguna a’di bwa a’kany’cesh mo dhali mmo’kuc̱a a’di bwa ki ’kari’th mowa? ’Kona um ki misha ki momiin ma Arumgimis ki mo/en mo tani ta ’pemen mmosus um mmorica du is mowa?

⁵Hili adum bum kun ’bi’thkin mo dhali kun tana ushiŋ gwo mo tani um tulkina nyor is is mo gom is bum mo ka cim ma nyor mo ki gwon dwall ma Arumgimis jin ta jiŋ ḵar/e minu ṯor eya tente/ mo be.

⁶Haali/ a’di midi c̱iya ris ’kwani to ka ’deṯe/ ’deṯe/ isi ki mii gun miikina uni mo be.

⁷A’di midi c̱i moŋ’koki/e ki sule/ ya ye ’ba/ mo ki uni gwansan kun miiki mii gun ’boron ki bwa gun ’kuc̱u mo ki ’kari’th mmosimm monyca e mo dhali montaḵ mo dhali mo gi molu wu mo be.

⁸Hili anyor midi di mo dhali mo jin ḵa/aḵa/ si’da/ mo gom uni gwansan kun ta ibiriŋ gwo mo dhali kun ush gwoŋ gana/ ha e mo mmomii mo hili uni ha gwon ton thus e mo mmomii mo be.

⁹Monṯo’c bwa midi di mo dhali wukura/ si’da/ goma ris ’kwaniny’cesh ’baar mo ki ’beles kun miiki miinthus mo. ’Kwani Yahuuda/ nṯwa/a/ mo dhali ’Kwaniŋ Griḵi si’da/ mo be.

¹⁰Hili monyca dhali montaḵ dhali moŋḵu’th is goma ris uni gun mii miiŋ gana/ mo, ’Kwani Yahuuda/ nṯwa/a/ mo dhali ’Kwaniŋ Griḵi si’da/ mo be.

¹¹Haali/ Arumgimis diki mii mii ka gwar ’de/ mo be.

¹²Aris uni gun miiki miinthus ki dar gi gwoŋḵan jin c̱inu mo tani minu ’ce’d sho’k si’da/ ki dar gi gwoŋḵan jin c̱inu mo be. Dhali aris uni gun miiki miinthus ’ko’di gwoŋḵan jin c̱inu mo tani uni minu dwall gwo ki gwoŋḵan jin c̱inu mo be.

¹³Haali/ uni gwansan gun shirki gwoŋḵan jin c̱inu ki ’ce mo tani uni yisa nta uniŋ ḵar/e ibwambor ma Arumgimis yisa. Hili uni gwansan gun miiki a’di mo tani uni idhunu ki mo ma ḵar/e mo be.

¹⁴Dhali ki ’kwani kun ’koki ta ’Kwani Yahuuda/ kun dar gi gwoŋḵan jin c̱inu mo mii ki buyem pa ki is buni a’di jin ḵana gwoŋḵan jin c̱inu mo tani uni ta gwoŋḵan ki is buni mo be. Hili ba uni idaran gi gwoŋḵan jin c̱inu mo.

¹⁵I/uni iṯori a’di mo ki a’di jin ḵana gwoŋḵan jin c̱inu mo tani a’di ’kwarkunu eya dum buni mo. Dhali kan si’da/ ’twa/ ma dum buni ta’da man/o gwo mo dhali gwo kun kuluma uni i bwa ki ji wushur mo tani yer uni is ki gway mo walla tor gwo ’twa/ mo sayii

¹⁶ka tee gwansan ka Arumgimis midi dwall ’kwani gwo kun kuma uni e bwa mo isi ki gwom ’borgam pem ka Ḵrisṯẖos jin ta’da Yesus mo be.