Rom 2:19-27

¹⁹Ka lükü pwe en eman chon emwen fän iten ekewe mi mesechun, pwal eu saram fän iten chokewe mi nom lon rochopwak,

²⁰pwal eman chon öüröür fän iten ekewe mi tiparoch me eman sense fän iten chokewe resap mirit. Ka lükü, pwe pokiten a wor reöm ekewe Allük ka silei unusen mettoch meinisin o mine ka apasa a fokun let.

²¹En ka aiti ngeni aramas ekewe Allük, pwota kosap püsin aiti ngonuk? Ka afalafala aramas pwe resap solä, nge ifa usumw, kosap püsin solä?

²²Ka apasa ngeni aramas pwe resap lisowu, nge ifa usumw, kosap lisowu? En ka fokun oput ekewe uluulun anümwäl, nge ifa usumw, kosap soläni mettoch seni lon ar kewe imwenfel?

²³Ka sikäsini usun än Kot kewe Allük mi nom reöm, nge ifa usumw, kosap atoto säw won Kot ren om purätiu an kewe allük?

²⁴Ekewe Toropwe mi Pin ra apasa, “Pokiten ämi chon Juta, ekewe chon lükün Israel ra aitengaua iten Kot.”

²⁵Are ka aleasochisi ekewe Allük, om sirkomsais a lomot, nge are ka aleasolap ngeni ekewe Allük a usun chök pwe kosap fokun sirkomsais.

²⁶Are eman chon lükün Israel esap sirkomsais a aleasochisi pwüngün ekewe Allük, ifa usun, Kot esap alealong i lon tettelin ekewe mi sirkomsais?

²⁷Iei usun ekewe chon lükün Israel repwe atipisikemi ämi chon Juta, pun ämi oua purätiu ekewe Allük, inamwo ika a makketiu fän itemi o ämi oua sirkomsais. Nge ir ra aleasochisi ekewe Allük, inamwo ika resap sirkomsais ren inisiir.