ᤖᤥᤔᤡ 2:19-27

¹⁹ᤜᤧᤰᤁᤩᤠᤱ ᤔᤡᤰᤑ᤺ᤶᤒᤠᤜᤠ᤹ᤖᤧ ᤂᤢᤏᤡ᤹ ᤗᤠᤶᤗᤥ᤺ᤒᤠ ᤏᤢ ᤂᤠᤍᤠᤶᤔᤠᤗᤢᤶᤔᤥ ᤁᤧᤘᤠ᤹ᤒᤠᤜᤠ᤹ᤖᤧ ᤂᤢᤏᤡ᤹ ᤀᤥ᤺ᤳᤋᤡᤀᤠ ᤑᤠ᤹ᤀᤠᤱ ᤏᤡᤛ᤻ᤛᤣ ᤁᤧᤈᤥᤃᤢᤀᤠᤱ ᤁᤧᤘᤠ᤹.

²⁰ᤀᤍᤱᤜᤠ᤹ᤖᤧ ᤂᤢᤏᤡ᤹ ᤛᤢᤈᤠᤍᤠᤱᤒᤠ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤧᤸᤗᤧ᤺ᤔᤏᤠᤒᤠᤜᤠ᤹ᤖᤧ ᤂᤢᤏᤡ᤹ ᤛᤡᤰᤛᤠᤶᤒᤠᤀᤠ ᤗ᤹ᤖᤡᤰ ᤁᤧᤀᤡ᤺ᤳᤋᤢ᤹. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤛᤠᤶᤕᤥᤌᤡᤶᤔᤥ ᤁᤠᤰ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤏᤢ ᤛᤧᤰᤂᤠ ᤐᤠ᤺ᤴᤜᤠ᤹ ᤂᤥ᤺ᤛᤢᤱᤅᤠᤱ ᤘᤠ᤹ᤀᤠ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢ᤹ᤖᤥ॥

²¹ᤜᤧᤰᤁᤣᤏᤧ ᤑᤠ᤹ᤃᤪ ᤂᤧᤏᤧ᤹ ᤘᤣ᤹ᤜᤠ᤹ ᤁᤧᤜᤢ᤹ᤖᤢᤛᤡᤀᤠᤱ ᤌᤣᤀᤠᤱ ᤀᤠᤒᤠᤅᤣ ᤁᤧᤴᤜᤢ᤹ᤛᤡᤱᤅᤡᤴᤒᤣ᥅ ᤂᤢ᤺ᤶᤔᤠ ᤔᤧ᤺ᤴ ᤗ᤹ᤖᤡᤰ ᤀᤡᤱᤃᤧᤓᤥ᤺ᤛᤢᤀᤠᤱ ᤁᤧᤄᤢ᤺ᤴᤒᤡ᥅

²²ᤂᤧᤏᤧ᤹ ᤘᤣ᤹ᤜᤠ᤹ ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ ᤗ᤹ᤖᤡᤰ ᤁᤧᤔᤧᤳᤋᤢᤛᤡᤀᤠᤱ ᤀᤠᤒᤠᤅᤣ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤡ᥅ ᤏᤠᤘᤠᤀᤡᤳᤗᤠᤜᤠ᤹ ᤀᤠᤛᤡᤰᤔᤧᤗᤧ᤺ᤱ ᤁᤧᤒᤠ᤺ᤳᤋᤢᤀᤠᤱ ᤏᤠᤘᤠᤀᤡᤳᤗᤠ ᤁᤧᤕᤢᤱᤒᤠ ᤔᤠᤱᤜᤡᤶᤔᤥ ᤔᤧᤍᤥ᤺ᤴᤍᤢᤒᤠ ᤕᤠᤱᤅᤡᤴ ᤁᤧᤄᤢ᤺ᤳᤋᤢ᤹ᤒᤡ᥅

²³ᤂᤧᤏᤧ᤹ ᤛᤠᤶᤕᤥᤌᤡᤶ ᤀᤡᤱᤈᤠ᤺ᤱᤅᤡᤴ ᤗᤧᤛ᤻ᤛᤢᤱ ᤗ᤹ᤖᤡᤰ ᤀᤠᤱᤍᤡᤱ ᤁᤧᤗ᤹. ᤁᤖ ᤛᤠᤶᤕᤥᤌᤡᤶᤔᤡᤴ ᤁᤧᤓᤣ᤺ᤴᤍᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤠ᤺ᤳᤌᤡ ᤁᤧᤍᤣ᤺ᤛᤢᤖᤥ॥

²⁴ᤛᤠᤶᤕᤥᤛᤠᤵᤗᤠᤀᤥ ᤂᤡᤏᤡ᤹ ᤕᤠ᤺ᤶᤒᤣᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤌᤡᤶᤔᤧᤴᤍᤱ ᤛᤢᤘᤠᤱᤗᤢᤶᤔᤥ ᤂᤡᤏᤡ᤹ ᤁᤧᤈᤥᤃᤢᤶᤔᤡᤸᤗᤧᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤠ᤺ᤳᤌᤡ ᤐᤣᤀᤠᤱ ᤘᤠ᤹ᤖᤥ॥”

²⁵ᤂᤧᤏᤧ᤹ ᤛᤠᤶᤕᤥᤌᤡᤶ ᤀᤡᤱᤈᤠ᤺ᤱᤅᤡᤴ ᤁᤧᤀᤡ᤺ᤳᤋᤢ ᤁᤧᤏᤠ᤺ᤳᤋᤢ᤹ᤏᤧ ᤑᤠ᤹ᤃᤪ ᤜᤷᤍᤥ ᤁᤧᤜᤧᤃᤢᤒᤠᤴ ᤏᤢ᤺ᤒᤠᤀᤣ ᤐᤥ᤺ᤱᤗᤥ. ᤁᤖ ᤛᤠᤶᤕᤥᤌᤡᤶ ᤀᤡᤱᤈᤠ᤺ᤱᤅᤡᤴ ᤁᤧᤓᤣ᤺ᤴᤍᤢᤏᤧ ᤑᤠ᤹ᤃᤪ ᤜᤷᤍᤥ ᤔᤧᤴᤜᤧᤰᤔᤏᤠᤒᤠ ᤁᤢᤀᤡᤛᤡ᤺ᤰ ᤁᤧᤒᤥ᤺ᤱᤗᤥ॥

²⁶ᤜᤷᤍᤥ ᤔᤧᤴᤜᤧᤰᤔᤏᤠᤒᤠ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤛᤠᤶᤕᤥᤌᤡᤶᤔᤡᤴ ᤔᤧᤀᤡ᤺ᤳᤋᤢ᤹ ᤔᤧᤏᤠ᤺ᤳᤋᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤜᤷᤍᤥ ᤁᤧᤜᤧᤰᤐᤠ ᤜᤧᤰᤁᤣᤀᤣ ᤀᤡ᤺ᤳᤋᤢᤛᤡ᤹ᤖᤥ॥

²⁷ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤛᤠᤶᤕᤥᤌᤡᤶ ᤏᤢ ᤜᤷᤍᤥ ᤜᤧᤰᤔᤠ ᤌᤡᤶ ᤁᤧᤃᤵᤐᤠᤀᤠᤱ ᤛᤠᤶᤕᤥᤌᤡᤶᤔᤡᤴ ᤁᤧᤓᤣ᤺ᤶᤒᤠ ᤕᤜᤢᤍᤡᤛᤣ. ᤏᤠᤛᤡᤱᤃᤧᤴ ᤌᤰᤁᤥ ᤜᤷᤍᤥ ᤜᤧᤰᤔᤠ ᤌᤡᤶ ᤔᤧᤱᤃᤵᤔᤏᤠ ᤁᤖ ᤛᤠᤶᤕᤥᤌᤡᤶ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ᤖᤧ ᤂᤡᤏᤡ᤹ ᤁᤧᤗᤠ᤹ᤖᤡᤒᤠ ᤀᤠᤵᤋᤡᤰᤁᤡᤴ ᤁᤧᤶᤃᤢ᤺ᤳᤋᤡ᤹ᤖᤥ॥