Rom 15:7-13

⁷Krisi loolo poia payam, ve igham gham amin le wa. Tauvene yam paam, lolomim poia pa taumim ve avaghamu poghani gham. Leso apaghazoŋai Maaron eeza tiina tomania tapiri ve poia tooni.

⁸Pa yau nasaav payam: Krisi imin besooŋa pa yes Yuda, ve igham uraat itaghon saveeŋ mbuaaŋ tau Maaron isavia pa timbuzŋa na. Leso anooŋa ivot, ve ipaghazoŋai Maaron ighe saveeŋ tooni, ene onoon mon.

⁹Ve igham nugh nugh tau Yuda mako na tipait Maaron eeza pa tapiri ve poia tooni. Pasaa, i loolo isaghatin zi, ve ireu sosor toozi. Saveeŋa tiboode pataghaaŋ tauvene: “Yau aat napait ghom ila nugh nugh tau Yuda mako na sosozi, ve nambou mbouŋ to napakur yo ezam.”

¹⁰Ve saveeŋ ziiri ite isaav tauvene: “Yam nugh nugh tau Yuda mako na, asov alup gham tomania Maaron tamtamon tooni, ve tintinmim pani.”

¹¹Ve saveeŋ ziiri ite isaav tauvene: “Yam tau Yuda mako na, asov apakur Maaron. Yam nugh nugh tau aleep irau taan na, asov ayoor eeza.”

¹²Propet Isaia paam isavia gabua tane ighe: “Paaghu ee to Yesi pale ivot gha imin kinik, ve igham pooz pa nugh naol isov. Nugh nugh tau Yuda mako na, pale tinumeera, ve tighur matazi pa saawe to i iuul zi tileep poi.”

¹³Maaron tau iit taghurghur mataan pani ne, pale igham yam tau aghur ila tooni na lolomim poia kat, ve aleep poia toman lolomim luuma. Ve Avuvu Patabuyaaŋ tapiri ipalot gham. Leso lolomim ruru sov, ve anumeer Maaron kat, ve asaŋan saawe to i igham mulin ghiit ve taleep poi. Onoon.