Rom 15:7-13

⁷Tana nio aŋso piom ta kembei: Niom ta boozomen na toŋmatiziŋ ki Krisi. Tana leleyom ambai par piom mi kaparkam yom, kembei ta Krisi leleene ambai piom mi ikam yom na. Naso kakam ma Anutu zaana iwe biibi.

⁸Pa Krisi, ni iwe mbesooŋo pizin Yuda bekena ikam ma sua ta muŋgu Anutu imbuk pa tumbun bizin na, iur ŋonoono.

⁹Naso tomtom tikilaala kembei Anutu itoto sua kini, mi zin wal ta Yuda somŋan i tiwit Anutu uruunu pa muŋaiŋana kini tomini. Mi ina ito sua ta tibeede muŋgu kek. Sua ta kembei: Uunu tina ta nio ko aŋbot la zin wal ta Yuda somŋan i mazwan, mi aŋwidit urum mi aŋbombo mboe bekena aŋpakur zom.

¹⁰Mi sua lwoono toro iso ta kembei: Niom wal ta Yuda somŋoyom na, kagaaba Anutu wal kini, mi niomŋan menmeen yom pini.

¹¹Mi sua lwoono toro tomini iso ta kembei: Niom wal ta Yuda somŋoyom na, kapakur Merere zaana. Niom karkari ta boozomen, kombo mboe mi kiwit uruunu.

¹²Mi Yesaya tomini iso ka sua. Pa iso: Popoŋana zaanaŋana tasa ki Yesi ko ipet. Mi ni tana, ta ko Anutu iuri ma iwe biibi be ikam peeze pizin kar ta boozomen. Tana zin wal ta Yuda somŋan i, ko tipase pini mi tiur matan pa koroŋ ambaiŋana tabe ni ikam pizin i.

¹³Anutu ta tu'urur matanda pini i, ko ikam yom ta kuurla na ma leleyom ambai, mi kombot ambai kat. Mi Bubuŋana Potomŋana mburaana ko ipombol yom be kombot, mi kazza koroŋ ambaiŋana kat tabe Anutu ikam piti i. Ŋonoono.