ROMANOS 15:7-13

⁷Cona, ngue niin loo gu': Fta' gu' lugar yòo chol mèn làth gu', mèn co' ndxela's xal mda' Crist lugar ngòo gu' loo cón che'n Crist par tataa mod gàc con' roo con' xèn loo Diox por cón che'n gu'.

⁸Tac con' co' ngue niin loo gu' ndxè' nac le' Crist mbi'th yáal loo izlyo' par li Crist sirv loo mèn co' nac mèn nación Israel par li la's mèna le' Diox indyè'de no par mdubque' di's xal nac di's co' mcàbgòn Diox loo xudgool na' co' ngo ban pólle'a. Tataa mbli Diox par mblu' Diox loo mèn le' Diox ndlique' co' mcàbgòn Diox li Diox loo mèn.

⁹Mbi'th yáal Jesucrist loo izlyo' ndxè', ne, par lyat lezo' Jesucrist ñèe Jesucrist mèn co' inacte mèn nación Israel. Tataa mbli Jesucrist par gàca le' mèn co' inacte mèn nación Israel tlo, ñii mèna di's roo di's xèn cón che'n Diox loo mèn xal ndub di's loo libr co' nac xti's Diox co' mde'th mèn. Di'sa mbez: Por cona, daa gab con' roo con' xèn cón che'n U', Tad, loo mèn co' inacte mèn nación Israel. No gol ron di's natú' cón che'n lèe U', Tad, loo mèn co' inacte mèn nación Israel par gàc con' guryath no con' guryèn loo U'.

¹⁰Tedib lugar le'n libr co' nac xti's Diox ndub di's co' gunii Moisés, co' mbezguè', ne: Fxo'f nde' fxo'f ndla' lezo' gu', mèn nación co' nziri' dib athu loo izlyo', con mèn co' nac mèn nacionpe' Diox co' nzo loo cón che'n Diox.

¹¹Tedib lugar le'n libr co' nac xti's Diox gunii David co' ngòc rey póla, ne: Gab mèn co' nac mèn chol nación co' nziri' dib athu loo izlyo' di's guryath no di's guryèn cón che'n Tad Diox. No lomisque', tyoodi's ryethe mèn co' nziri' dib athu loo izlyo' cón che'n con' roo con' xèn co' mbli Tad Diox no co' nac Tad Diox.

¹²Tedib lugar loo libr co' nac xti's Diox ndub di's co' gunii Sayi, ne, di's co' mbez: Gáal thìb mbi' co' nde bin Isaí co' ngòc xud David co' ngòc rey póla. Gáal mbi'a co'se' ihuaxte bin Isaí nzo no co'se' nden' mèn yende cón ntac bin Isaí. Mbi'a gàc mbi' co' ñibe' loo mèn nación co' inacte mèn nación Israel. Le' sya, mèn co' inacte mèn nación Israel cue quee lezo' loo mbi' co' nac bin Isaí. No ngóolque' mbi'a. Mbi'a nac Tad Jesucrist.

¹³Ndlyazen le' Diox, co' ndli toloque' cue quee lezo' mèn loo cón che'n Crist, tolo li par xyo'f nde' xyo'f ndla' lezo' gu' loo con' co' ndxela's gu' loo Crist. No ndlyazen le' Diox li tolo que tee ban gu' rye nda gu' no rye ndye'th gu' làth xtàa gu' loo con' co' ndxela's gu' loo Crist par tataa mod cue quee lezo' gu' axta plóthe loo cón che'n Crist por cón che'n ryethe con' co' nac con' roo no con' xèn co' nzo la's nii Xpii Natú' no co' nzo la's ya' Xpii Natú' co' ndlyath no gu'.