Rom 15:7-13

⁷Te yi mɨt miyapɨr en yi eiyɨthis ni yinan eitikeri han kiutɨp eiyu eiyɨr ke Krais ketihis yi mɨt miyapɨr te mɨt nau tɨ nanwenɨpi niuk me God nanɨnterim.

⁸Yi eiyɨthis ni yinan eitikeri eikiyan eiyu eiyɨntar hi hetpi menmen im me Krais. Hɨrak keweikɨn kɨre mɨtɨk kɨkaap mɨt ne Isrel kerek nerekir yɨnk kɨr, hɨrak keteiknor God katɨp hɨm yaaim hɨrak kakises menmen nɨpaa katɨp maam nɨpurer tɨrak Ebraham Aisak Jekop hɨrak ketporem. Hɨrak ken kɨrɨak menmen im keremem au.

⁹Krais kan te mɨt miyapɨr ne weiwɨk ham nanwenɨpi niuk me God me menmen im. God hɨrak hanhan keriuwe haiu mɨt yapɨrwe. Hɨm me God mau tɨwei Sam kerek Devit kewisɨm hɨram matɨp mar im: “Hentar menmen im hi hau nɨmɨn ke mɨt miyapɨr ne weiwɨk ham, hi awenɨpi niuk mit, hi hinut henye.”

¹⁰Hɨram hɨm ham Moses kewisɨm hɨram matɨp mar im: “Yi mɨt ap ne weiwɨk me Isrel eitike mɨt miyapɨr ne Isrel, yi han yaaik eiyu.”

¹¹Hɨm ham matɨp mar im: “Yi mɨt miyapɨr ap ne weiwɨk me Isrel, yi eiwenɨpi niuk me Mɨtɨk Iuwe God. Yi yapɨrwe yi eiwenɨpiyek wɨsenum.”

¹²Hɨm me God Aisaia kewisɨm mau tɨwei matɨp mar im: “Maain nepenyek hak ke maam Jesi (hɨrak haai ke Devit) hɨrak kaknen kakɨr ke nu hɨr mɨt nɨkan, hɨrak pɨke kensunen. Hɨrak kaknen mɨt ap ne weiwɨk me Isrel hɨrak naanmamror hɨr nanmeriyɨwek hɨrak kakɨkepi hɨr nanɨre yaain.”

¹³Hi hanhan God kerek kenipai haiu mameriyɨwek hɨrak kakɨkepai kaktaihis, hɨrak kaknip yi han yaaik wɨsenum yi han ki kaku werek yi yisesik werek werek. Te God Hɨmɨn Yaaik kakriuwe menmen mɨrak iuwe kaknipi yi eimeriyɨwek ere God kakweti menmen yaaim mɨrak.