7ꞌEnega gosemiyao ꞌebweuna ꞌebweuna wada bwauyedi ꞌimi egosigosiyanao ꞌediya, nadigega Yesu Keliso ꞌaboꞌada ꞌiegosigosiyaneda, be ꞌimi egosigosiyana boboꞌana ꞌenega Yaubada ꞌana tupu ꞌida sinabwa.
8Ta wada nuwaꞌiꞌisi ꞌaene Keliso wate me Yudia ꞌediya ꞌietoguinuwa, be ꞌenega Yaubada ꞌina onaupaupa nina gimi ꞌinapwanao ꞌediya ꞌana ꞌaiꞌaila ꞌida apwesa,
9ta wate ꞌaene taudi nigeya me Yudia sena yauyaudi ꞌediya simiyami, Yaubada sida tupu ꞌina ꞌatenuwaꞌoleꞌole ꞌediya manuna. Manuna ꞌebweu ꞌetoladi Buki Tabu ꞌena ꞌigwae, “Gete ꞌalena ꞌenega sena yauyaudi maꞌegwao ꞌada tupuyo, ta wate ꞌamu esana manuna ꞌada wali tuputupu ꞌemuya.”
10Ta wate ꞌigwae, “Sena maiboꞌana ꞌediya wamiyamiya, Yaubada ꞌina tomotaiyao maꞌemiyao wada egwausowala.”
11Ta wate ꞌigwae, “ꞌOmi nigeya me Yudia, ꞌInapwana nina wada tupu, ta wate maiboꞌami wada ꞌawaboboꞌane.”
12Wate nadigega Aisea ꞌina buki ꞌena ꞌigwae, “ꞌIabe Desi ꞌina boda ꞌenega ꞌebweu tai ꞌimama be sena maiboꞌana ꞌediya ꞌietoloina, be taudi nigeya me Yudia sida emise ꞌaene tauna ꞌida ꞌetoseyedi.”
13Ta onaꞌaiꞌaila, Yaubada namo ma ꞌana emisa, manuna taunamo ꞌenega lema boboꞌadi talobalobadi, ꞌenega nuwanuwagu be ma imi gwausowala wada emisa ꞌaene ꞌimi miya sida boboꞌana, ta wate Yaluyaluwa Tabuna ꞌina waiwaiyega ꞌimi emisao nidi ꞌida giesinabwa ꞌaiꞌailidi.
Loma 15
Loma 15:7-13