1Nyangka puurrpa Tjutjayilu-tjananya wati pirni witurnu yankula-tjananya liita pirninya ngurra kutjupa-kutjupangka yarltirra katitjaku. Nyangka-ya mularrpartu-tjananya yarltirra katingu.
2Nyangka-ya lurrtjurringkula mapitjangu tjurrtju purlkanyangka tjarrpangu. Nyangka-ya yarnangu pirninyatarra lurrtjurringkula pitjangu. Nyangka Tjutjayilu Mama Kuurrku wangka ruulangkatjanya nyakula watjarayirnu wiyarnu.
3Palunyalu watjarnu wantingu Mama Kuurrku wangka wangarnarralu kulira palyalkitjalu. Nyangka-ya yarnangu pirnilu palunyapirinypartu watjarnu wantingu.
4Nyangka puurrpa Tjutjayilu-tjananya wati nyarra tjurrtjungka waarka palyalpayinya watjarnu, “Wiya, yurrara-ya makati warni palyamunu pirni nyarra pupakatirra marninypungkupayinya.” Nyangka-ya mularrpartu yurrara katirra karrungka warnirranytja. Palunyalu-ya tilirnu tjarrpatjunu tjiinyamarntu puurrpa Tjutjayilu watjarnu wantinyangka.
