Psalm 66:1-14

¹Kaksakin God ke pusren engan lulap, kowos mwet faclu nufon!

²Onkakin Ine wolana lal, Akfulatyal ke pusren kaksak wolana!

³Kowos in fahk nu sin God, “Fuka lupan wolana lun ma kom oru! Ku lom arulana yohk, Oru mwet lokoalok lom elos sangeng ac putati ye motom.

⁴Mwet nukewa fin faclu elos alu nu sum; Elos on kaksakin kom, Ac yuk on in kaksak nu ke Inem.”

⁵Fahsru ac liye ma su God El orala, Orekma wolana lal inmasrlon mwet uh.

⁶El ekulla meoa nu ke facl pao. Mwet matu lasr elos tuh fahsr sasla infacl uh ke nialos. Kut arulana engan ingo ke sripen ma El oru uh.

⁷El leum ma pahtpat ke ku lal, Mutal ngeta liye mutunfacl uh. Lela in wangin mwet tuyak lainul.

⁸Kaksakin God lasr, kowos mutanfahl nukewa; Lela in lohngyuk pusren kaksak lowos.

⁹El karingin moul lasr Ac tia lela kut in ikori.

¹⁰O God, kom srike kut — Oana ke silver ac liklikiyuki ke e, Ouinge kom srike kut.

¹¹Kom lela tuh kut in putatyang nu in kwasrip Ac filiya ma toasr finpisasr.

¹²Kom lela tuh mwet lokoalok lasr in longkuti; Kut fahsr sasla in e ac in sronot, A inge kom sifil uskutme nu in sie acn misla.

¹³Nga ac fah tuku nu in lohm sum wi mwe kisa firir; Nga ac fah sot nu sum ma nga wulela kac.

¹⁴Nga ac fah asot nu sum ma nga tuh fahk mu nga ac oru Ke pacl nga tuh muta in ongoiya.