Yabura 66:1-14

¹Bɛɛti nun suuki bɛɛtibae xa mangɛ bɛ Adamadie birin xui xa ite sɛɛwɛ ra Ala bɛ.

²Wo xa a xili binya bɛɛti ra, wo xa a binya matɔxɔɛ ra.

³Wo xa a fala Ala bɛ, «I xa kaabanakoe magaaxu. I sɛnbɛ gbo han. Hali i yaxuie sɛrɛnma i ya ra.

⁴Duniɲa birin i batuma, e i binya bɛɛti ra, e i xili matɔxɔ.» Ɲɛngi rate.

⁵Wo fa Ala xa wali matode. A na fe raba adamadie tagi, na magaaxu.

⁶A baa findi xare ra, a mixi ragiri xure ma e sanyi xaraxi ra. Na kui, won ɲɛlɛxinma nɛ a ra.

⁷A duniɲa yamarima sɛnbɛ ra abadan. A ya tixi sie ra, matandilae mu nɔma kelide sɔnɔn. Ɲɛngi rate.

⁸Sie, wo xa won Marigi Ala tantu, wo xa wo xui ramini a matɔxɔfe ra.

⁹A bara simaya fi won ma, a mu tin won xa bira,

¹⁰barima Ala won bɔɲɛ kolon. A bara won mato alɔ mixi gbeti matoma ki naxɛ a a raxunu alako a gbi xa ba.

¹¹I bara muxu xun ti yɛlɛ kui ra, i man bara kote dɔxɔ muxu xun ma.

¹²I bara a lu mixie xa nɔ muxu ra, muxu xa tɔɔrɔ ye nun tɛ xɔɔra. Kɔnɔ a raɲɔnyi, i bara muxu xun ti daxamui yire ra.

¹³N fama sɛrɛxɛ gan daaxi ra i xa banxi kui, n nan n ma laayidi rakamalima nɛ,

¹⁴n naxee fala n dɛ ra n nu tɔɔrɛ kui tɛmui naxɛ.