Salmo 66:1-14

¹Dakayo amin ay ipogaw isnan daga, begew si ragsak yo, ipigsa yo koma ay mankanta en Diyos ay mangidaydayaw en sisya.

²Ikanta yo din kinapateg di ngadana, ta say madaydayaw din nakaskasdaaw ay kinadiyos na.

³Kanan yo, “Nakaskasdaaw din inam-amag mo, isonga manpalikotkot da din kalaban mo gapo sin kaeegyat ay panakabalin mo.

⁴Amin ay ipogaw sin daga yan daydayawen daka, mankanta da ay mangidayaw en sik-a.”

⁵Omali kayo ta ilaen yo amin din inamag di Apo. Inamag na di nakaskasdaaw ay inilan di kaipoipogaw.

⁶Din baybay yan nanbalinena ay namgaan din lanad na, siya abe sin ginawang et nandan din ipogaw na sin nanbalasatan da, isonga dayawen takos sisya.

⁷Manturay si eng-enggana babaen sin panakabalina, din nanasyon et kanayon ay il-ilaena, maga koma di mangontra en sisya.

⁸Amin ay ili, dayawen yo din Diyos tako, ikanta yo din panangdayaw yo.

⁹Inayowanana din biyag tako, adi na inpalobos ay maisokba tako.

¹⁰Tan pinadas mos dakami, Apo, nilinisam dakami ay kaman balitok ay maioto.

¹¹Inpalobos mo ay matagdey kami, inpabaklay mo di nadagsen en dakami.

¹²Pinalobosam din kalaban mi ay mangigatigatin en dakami. Sin nanligligatan mi, kaman apoy ya layos di nilasat mi, ngem ed wani, in-ey mos dakami si nabaknang ay ili ay pantean mi.

¹³Man-idatengak to si daton ay mapooan sin beey mo et tongpalek din inkarik en sik-a, Apo,

¹⁴sin timpon di ligat ko.