Psalm 22:6-15

⁶A inge nga tia sifilpa mwet se; nga oana wet soko, Mwet nukewa srungayu ac aksruksrukyeyu.

⁷Elos nukewa su liyeyu elos aksruksrukyeyu; Elos yayaiyu ac isrunyu.

⁸Elos fahk nu sik, “Kom lungsena lulalfongi LEUM GOD, Efu El ku tia molikomla? Fin pwaye LEUM GOD El lungse kom, Efu ku El tia kasrekom?”

⁹Kom pa akisusyeyula liki insien nina kiuk, Ac karinginyu ke nga katitiiyuk.

¹⁰Nga nuna lulalfongi kom e ke len se nga isusla ah me, Ac kom nuna God luk.

¹¹Nik kom loesla likiyu! Mwe ongoiya apkuranme Ac wangin mwet in kasreyu.

¹²Mwet lokoalok puspis apinyula oana cow mukul; Elos rauniyula yen nukewa Oana cow mukul sulallal in acn Bashan.

¹³Elos mangelik oana lion Su ngutngut ac kena kunausyula.

¹⁴Ku luk wanginla, Wanginla oana kof ma kahkla nu infohk uh. Sri nukewa keik tufwaclik; Insiuk kofelik oana kiris.

¹⁵Kapinsrulyuk pulamlamla oana kutkut, Ac louk fulfuli nu ke lac oalik lucng. Kom sisyula oana mwet misa se infohk uh.