Psalm 140:1-8

¹Psalm lal David LEUM GOD, moliyula liki mwet koluk; Langoeyula liki mwet sulallal.

²Pacl nukewa elos pwapa in oru ma koluk; Elos purakak akukuin in pacl e nukewa.

³Lohulos oana serpent sulallal; Kas lalos oana pwasin ke wet cobra.

⁴LEUM GOD, moliyula liki ku lun mwet koluk; Langoeyula liki mwet sulallal Su kena tuh nga in ikori.

⁵Mwet filang elos kena sruokyuwi; Elos oakiya mwe kwasrip lalos, Ac filiya sruhf pe inkanek uh in sruokyu.

⁶Nga fahk nu sin LEUM GOD, “Kom God luk.” LEUM GOD, porongeyu ke nga pang in suk kasru sum!

⁷LEUM GOD Fulatlana luk, ke ku lom Kom langoeyula in pacl in mweun.

⁸LEUM GOD, nikmet sang nu sin mwet koluk ma lungse lalos; Nikmet akfahsrye pwapa koluk lalos.