Pisalem 140:1-8

¹Meenei Dimaadua, haga dagaloaha ina au gi daha mo digau huaidu. Benebene ina au gi daha mo digau daaligi dangada.

²Digaula e haga tataele nadau mee huaidu i nia madagoaa huogodoo, e nnoo mau e hai nia daangada gi lagamaaloo.

³Nia holole digaula e hai gadoo be nia holole gihaa daaligi dangada. Nia helekai digaula e hai be nia poisin gihaa.

⁴Meenei Dimaadua, abaabalia au gi daha mo nia mogobuna o digau huaidu, duulia au gi daha mo digau daaligi dangada ala bolo ginaadou e hai au gii doo.

⁵Digau hagamuamua guu hai di nadau hele belee hele au. Digaula guu dugu nadau hele i nia daalinga nia ala belee kumi au.

⁶Gei au ga helekai gi Dimaadua, “Ma Kooe di God ni oogu.” Meenei Dimaadua, hagalongo mai gi dagu gahigahi i di hagamaamaa!

⁷Meenei dogu Dagi go Yihowah, dogu Dangada Hagamaamaa maaloo, Goe ne duuli au i lodo teebagi.

⁸Meenei Dimaadua, Goe hudee wanga ina gi digau huaidu nia mee digaula ala e hiihai ginai, hudee heia nia hagatataele huaidu digaula gii kila.