Proverbios 1:2-12

²Cay rimaycunataga isquirbisha: Chayta yachacur runacuna yachaj cananpämi, yarpaysapa cananpämi, yachaj runacuna parlashanta tantiyacunanpämi,

³willapashancunata chasquicunanpämi, quiquin tantiyacunanpaj, allillata rurananpaj, furmal cananpaj;

⁴mana yarpachacoj mösucunata tantiyachinanpaj, yarpaysapa cananpaj.

⁵Yachajcunapis, yarpaysapacunapis cay rimaycunata wiyarga masmi yachacun.

⁶Chauraga tantiyanmi yarpaysapacuna parlashanta, adibinansancunata, willapancunata.

⁷Rasunpa yachaj canapäga rimëru Tayta Diostami rispitar yäracuypaj. Tantiyacuyta mana munajcunami ichanga alli yachachicuycunatapis, willapashancunatapis manacajman churan.

⁸Ïju, taytayqui willapäshushayquita sumaj wiyacuy. Mamayqui tantiyachishushayquitaga ama gongaychu.

⁹Chay willapäshushayqui, chay tantiyachishushayqui gampäga canga cuyayllapaj adurnunömi.

¹⁰Ïju, juchasapacuna juchata rurachiyta munashuptiqui ama ruranquichu.

¹¹Paycunaga capas nishunquiman: «Aywashun. Runacuna näninpa aywajta pacacuycullar shuyaräshun. Alli runa päsacuycajta wañurachishun.

¹²Alli runacunataga illajpita illgarachishun, gueshya charir imanömi illajpita wañurachin, chayno.