1Iau o Pol, mir nam o Timoti, aru tultul anun o Karisito Iesu, mir tumtumus torom mot, a taro rop anun o God, tiro una tamon Pilipai. Torom mot ra mot laun un o Karisito Iesu, ma mot kai a kum mugumugu na lotu ma a kum tene warut.
2A marmaris ma a malmal tan o God a Tamandat ma a Labino o Iesu Karisito in kis tomo nam mot.
3A watung wakak torom anung a God una kum du bung rop ra a nuk pas mot.
4Ma una nung a kum niaring rop sur mot rop, a ser wararing nama gasgas,
5uni mot tur tomo nam iau una Wakak na Wasiso, turpasi ut una mugano bung ra mot longoro i tuk uniri.
6A tasman mulusi lena, o God ra i turpas a wakak na pinapam un mot, in pam nanani, tuk ra in uropi, una bung ra o Karisito Iesu in nan pirso melet.
7I tokodos sur an nuknuk lenri un mot rop, uni mot kis mulus una nuknuking. Dat rop dat tur tomo una pinapam ra o God i pitar tari tang una nun a marmaris. Dat tur tomo ra a kis una karabus, ra a wasiso balu det ra det watung laulau a Wakak na Wasiso, ra a upuaso i torom a taro.
8O God i tasmani lena, a nem doko i sur an tama mot rop, uni a nem doko mot nama marmaris anun o Karisito Iesu.
9A wararing sur anumot a marmaris in labo ma in labo bing, ma a mananos ma a tastasman in lubung una numot a nilaun.
10Ra in lenra, mot in pet lari sur mot in tasman lele asau ra i wakak o ke wakak, sur a magiramot in tokodos umatan o God, ma katu etakun in los mot una bung ra o Karisito in nanpat.
11Ma a wararing sur mot in bukus nama tokodosino, ra o Iesu Karisito in pam pati una numot a nilaun, sur a taro det in watung ulabo pas o God, ma det in rakon lekeleke pasi.
12A kum tistising, a nemi sur mot in tasmani lena, a kum mamaut ra a taramo i, i ulubung a Wakak na Wasiso sur in nan sarara.
13Uni i talapor torom a kum tene inaim rop ra det tamtamabat a rumu anun a king, ma torom a taro rop kai lena, a kis una karabus uni iau anun o Karisito.
14Anung a kinkinis na karabus i sa uragot a susut na taro ra met nisnisino una Labino, ma ka det ngara sur det in wasiso puaso nama wasiso anun o God nama dekdek.
15A lingmulus, ara taro det warawai un o Karisito uni det nuknuk laulau un iau. Ma ara taro kai, det warawai uni det nem na turbat iau gusun anung a kinkinis na mugumugu. Ikut, ara taro det warawai nama wakak na nuknukin det.
16Det warawai uni a marmaris i kis un det. Det tasmani lena, a kis una karabus sur an wasiso balu a taro ra det watung laulau a Wakak na Wasiso.
17Ikut ara taro det warawai un o Karisito uni det nem na ulabo pas det ut, ma ke lingmulus a nuknukin det. Det nem na wot meleti kut anung a kum mamaut, ra a kis una karabus.
18Ikut katu utna ra det warawai nama sakino nuknuk, o a wakak na nuknuk. Det rop ri det warawai kut un o Karisito. Iri a kibino ra a gas. A lingmulus, an gas bolbolos,
19uni a tasmani lena, una numot a kum niaring, ma a warut anun a Nion o Iesu Karisito, asau ra i wanpat un iau din pukusi sur an langolango.
20A nurnur lena, kan pam tu utna ra an maimai uni. An tur dekdek ma kan ngara, sur an ulabo pas o Karisito una nung a kum petutna rop elar nami ra numugu a ser pami. Sako an laun o an mat, an ulabo pasi ut.
21Uni a nuknuking i lenri: Ra a laun, a laun sur o Karisito. Ra an mat, an rakon pas a labino utna sakit.
22Ra a laun, anung a pinapam in wu a wakak na wino. Ka tasmani osi na pasander mo ra an pilok pasi, a nilaun, o a minat.
23Aru nuknuking. Ara, a nem doko i, sur an nan ma an kis tomo nam o Karisito, i ra i wakak sakit tan ara pasander.
24Ikut i wakak sakit sur an laun, ra an warut mot.
25A tasman mulusi lena, an laun ma an kis tomo nam mot, sur mot in lubung, ma mot in gas una nurnur.
26Ra dat in tamtama tomo melet, anumot a gasgas un o Karisito Iesu in bukus ma in tiltilingis, kibino un iau.
27Asau ra in nanpat, anumot a nilaun in mur sot pas a Wakak na Wasiso anun o Karisito. Ra an nan sur an tama mot, o ra an kis bakbak ma an longoro i kut a wasiso un mot, an tasmani lena, mot tur dekdek un ara nuknuk sot kut, ra mot papam tomo nam ara nuknuki mot kut sur a taro det in nurnur una Wakak na Wasiso,
28ma ka mot in ngaran a kum ebar. Iri a ukinalong torom anumot a kum ebar ra det in iru, ikut torom mot, o God in ulaun mot. O God ut in pam a kum utna ra.
29Uni o God i udan mot. Awu sur i udan mot nama numot a nurnur kut un o Karisito, awu, i udan mot nama mamaut kai, ra mot taramo i uni mot tagun o Karisito.
30Mot taramo a mamaut uni mot sa tur tomo nam iau una inaim. A inaim ra numugu mot tama i ra a pami, ma uniri mot longoro i ra a ser pami utmakai.
