ፒሊጲሲዮሳ 1

1

2

3

4

¹ኑኒ ዬሱሲ ኪሪስቶሳ ኦሳንቻቱ ጳዉሎሲኔ ፂሞቶሲ፥ ኪሪስቶሳ ዬሱሳን ዴዒያዋንቶ፥ ፒሊጲሲዮሳ ጊያ ካታማን ዴዒያ ጌሻቶ ኡባቶ፥ ኣማኒያዋንታ ካሌꬂያዋንቶኔ ማዲያዋንቶ ሃ ዳቢዳቢያ ፃፌቶ።

²ኑ ኣዉዋ ፆሳፔኔ ጎዳ ዬሱሲ ኪሪስቶሳፔ ኣꬎ ኬካቴꬃዪኔ ሳሮቴꬃይ ሂንቴንቶ ጊዶ።

³ታኒ ሂንቴና ሃሳዪያ ዎዴ ኡባን ታ ፆሳ ጋላታይ።

⁴ሂንቴ ኮዪሮ ጋላሳፔ ሃኖ ጋካናው፥ ሚሺራቹዋ ቃላ ኦዲያዋን ታና ማዴዳ ዲራው፥ ታኒ ኡባ ዎዴ ሂንቴንቶ ኡባው ናሼቻን ፆሳ ዎሳይ።

⁶ቃሲ ሂንቴንቱ ጊዶን ሎዖ ኦሱዋ ዶሜዳ ፆሳይ፥ ኪሪስቶሲ ዬሱሲ ሲሚያ ጋላሳይ ጋካናው ፖላናዋ ኤራይ።

⁷ታኒ ሂንቴንቶ ኡባው ሄዋዳን ቆፓናው ቤሴ፤ ኣዪሲ ጎፔ፥ ታኒ ሂንቴና ኡባ ዎዴ ሃሳያይ። ሃዒ ታኒ ቃሹዋን ዴዒያዋኒኔ ዎንጋላው ሞቴቲያዋን፥ ቃሲ ዎንጋላ ሚኒሳ ኤሲያዋኒኔ፥ ፆሳይ ታው ቃዴዳ ቃዳ ሂንቴካ ታናና ጊሺ ኣኬዲታ።

⁸ኣዪሲ ጎፔ፥ ታኒ ሂንቴና ኡባቱዋ ኪሪስቶሲ ዬሱሳፔ ዪያ ሲቁዋን ኣይ ኬና ሲቂንቶ፥ ፆሳይ ታው ማርካ።

⁹ቃሲ ታኒ ሂንቴንቶ ፆሳ ዎሲያዌ ሃዋ፤ ሎዖባ ኣያኔካ ዶራናው ሂንቴንቱ ዳንዳያናዳኒኔ፥ ቃሲ ሂንቴንቱ ሲቁ ቱሙ ኤራቴꬃናኔ ኣኬካ ኡባና ኢቲፔ ጉጂ ጉጂ ዲጫናዳን፥ ፆሳ ዎሳይ፤ ያቲዴ ኪሪስቶሲ ሲሚያ ጋላሳን ሂንቴንቱ ሱሬኔ ፖኩ ባይናዋንታ ጊዳና።

¹¹ቃሲ ሂንቴንቱ ሼምፑካ ፆሳ ቦንቾኔ ጋላታው ዬሱሲ ኪሪስቶሳ ባጋና ቤቲያ ፂሎቴꬃ ኣይፊያ ኣዪፋና።

¹²ታናዳን ፆሳ ካሊያዋንቶ፥ ሃ ታና ጋኬዳዌ ሚሺራቹዋ ቃላይ ኣካናዳን ቱሙ ማዴዳዋ ሂንቴንቱ ኤራና ማላ ኮያይ።

¹³ታኒ ኪሪስቶሳ ዲራው ቃሼቴዳዋ፥ ካቲያ ጎሊያ ናጊያ ኡባቱኔ ሃዋን ዴዒያ ሃራቱ ኡባቱ ኤሪኖ።

¹⁴ቃሲ ታኒ ቃሼቴዳዌ ኑ ኢሻቱዋፔ ዳሪያዋንቱ ጎዳን ሎይꬂ ኣማኔቲዴ፥ ፆሳ ቃላ ያሺ ባይናን ካሴዋፔ ፃሊዴ ኦዳናዳን ማዴዳ።

¹⁵ቱሙፔ ኢቱ ኢቱ ቃናቲያ ዲራዉኔ ፓሉሚያ ዲራው፥ ኪሪስቶሳዋ ኦዲኖ፤ ሺን ሃራንቱ ሎዖ ኣሙዋን ኦዲኖ።

¹⁶ሃዋንቱ ፆሳይ ታው ዎንጋላ ናጊያ ኦሱዋ ኢሜዳ ዲራው፥ ሲቂዴ ቃላ ኦዲኖ።

¹⁷ሺን ዮኮንቱ ታኒ ቃሹዋን ዴዒሺን፥ ታ ቦላ ዋዪያ ኣሃናዋ ኡንቱንቶ ማላቲና፥ ባሬና ሲቂያ ዎልቃማ ኣሙዋን ኪሪስቶሳዋ ኦዲኖፔ ኣቲን፥ ዎዛናፔ ኦዲኪኖ።

¹⁸ኣይኔ ባዋ፤ ማላቲሲያ ኦዶኔ ጊዶ ዎይ ቱሙ ኦዶኔ ጊዶ፥ ኣይ ኦጊያኒኔ ኪሪስቶሳዋ ኦዶፔ፥ ታኒ ሄዋን ናሼታይ። ሲንꬃናዉካ ቃሲ ታኒ ናሼታና።

¹⁹ኣዪሲ ጎፔ፥ ታኒ ሂንቴንቱ ዎሳኒኔ ዬሱሲ ኪሪስቶሳ ኣያናፔ ዪያ ማዱዋን ኣታናዋ ኤራይ።

²⁰ታ ዎልቃማ ኣሙኔ ፆሳፔ ኣካና ጋዴ ታኒ ናሼቻን ናጊያ ናጉ ኣዬ ጎፔ፥ ታኒ ፓፃ ዴዒናካ ዎይ ሃዪቂናካ ያዬናን፥ ካሴዋዳን ሃዒካ ታ ኩሜንꬃ ኣሳቴꬃን ኪሪስቶሲ ቦንቼታናዋፔ ኣቲን፥ ታኒ ሃራይ ኣቶ ኢቲባንካ ዬላቴናን ኣታናሳ።

²¹ኣዪሲ ጎፔ፥ ታው ዴዑ ኪሪስቶሳ፤ ቃሲ ሃዪቁካ ታው ጎዓ።

²²ሺን ታኒ ፓፃ ዴዒያዋን ዳሮ ጎዒያዋ ኦꬃናዋ ጊዶፔ፥ ሃቃዋ ዶራኔንቶ ታው ኤሬቴና።

²³ታኒ ሃ ላዑ ዬዋቱዋን ሜቶታይ፤ ሃ ዴዑዋፔ ሻኬታናዉኔ ቃሲ ኪሪስቶሳና ኢቲፔ ዴዓናው ኣሞታይ፤ ኪሪስቶሳና ኢቲፔ ዴዒያዌ ኡባፔ ኣꬌዳ ዳሮ ሎዖባ።

²⁴ሺን ታኒ ሃዪቂያዋፔ ሂንቴንቱ ዲራው ፓፃ ዴዒያዌ ሂንቴና ዳሮ ኮሺያዋ።

²⁵ሃዌ ቱማ ጊዲያዋ ታኒ ጌሻዴ ኤራይ፤ ቃሲ ኣማኑዋን ሂንቴንቱ ዲጫናዳኒኔ ናሼታናዳን፥ ታኒ ሂንቴናና ኡባና ፓፃ ዴዓና።

²⁶ሄዋ ዲራው፥ ታኒ ሂንቴናና ላዔꬁዋ ዪያ ዎዴ፥ ኪሪስቶሳ ዬሱሳና ሂንቴ ዴዒያ ዴዑዋን፥ ታባን ጬቄቲያባይ ሂንቴንቶ ዳራና።

²⁷ጊዶፔካ፥ ሂንቴንቱ ሂንቴንቱ ሁጴው ኪሪስቶሳ ዎንጋላው ቤሲያ ዴዑዋ ዴዒቴ፤ ታኒ ሂንቴና ባዴ ዎይ ቤዓና ꬋዪና፥ ሂንቴንቱ ኢቲ ቆፋን ሚኒዴ ኤቄዳዋኔ፥ ቃሲ ዎንጋላ ኣማኖ ኢቲ ዎዛና ጊዲዴ ኢቲፔ ባፄቲያዋ ሲሳና።

²⁸ሂንቴ ሞርኬቱዋሲ ኣያንካ ያዮፒቴ፤ ሄዌ ኡንቱንቶ ኡንቱንቱ ባሻ ꬊሺሴ፤ ሺን ፆሳይ ሂንቴና ፆኒሲያ ዲራው፥ ሂንቴንቶ ኣቶቴꬃ ꬊሺሴ።

²⁹ኣዪሲ ጎፔ፥ ኪሪስቶሳው ኦꬂያ ቃዳይ ሂንቴና ጋኬዳዌ ሂንቴንቱ ኣኒ ኣማናና ፃላላሳ ጊዴናን ኣ ዲራው ዋዪያካ ኣካናሳ።

³⁰ታኒ ካሴ ባፄቲሺን ሂንቴንቱ ቤዔዳዋ ማላ ባፂኔ ቃሲ ሃዒካ ታኒ ባፄቲያዋ ሂንቴንቱ ሲሲያዋ ማላይ ሂንቴና ጋኬዳ።