ፒልጲሲዮሴ ዓሶም 1

1

2

3

4

¹ሓይ ኪኢታ'' ዬሱስ ኪሪስቶሴም ማዻያ ማዔ፥ ጳውሎሴና ፂሞቴዋሴናይዳፓ ዳኪንቴያኬ፤ ዳኪንቴሢያ ፒልጲሲዮሴ ካታማ'' ናንጋ ዬሱስ ኪሪስቶሴ ጉሙርቂፆና ፆኦሲም ዱማዼ ዓሶና ሺኢጲፆ ማኣሮ ዎይሣ ዓሶና ዲያቆኔ ማዒ ዔያቶ ማኣዲ'' ማዻ ዓሶናምኬ፤

²ኑኡኮ ዓዳሢ፥ ፆኦዛሢዳፓ፤ ዬያጉዲ ሃሣ፥ ጎዳ ዬሱስ ኪሪስቶሴይዳፓ ፆኦሲኮ ኮሹሞ ዒንጊፆና ዎዛና ዒንሢም ማዖንጎ።

³ዒንሢ ታ ጶቂሣ ዎዶ''ና ቢያ፡ ታ ፆኦዛሢ ታኣኒ ጋላታኔ።

⁴ዒንሢ ቢያሢም ታ ሺኢቃኣና ዼኤፒ ዎዛና ታ ሺኢቃኔ።

⁵ታኣኒ ፒልጲሲዮሴ ካታሞ ሄሌ'' ኬላ''ፓ ዓርቃዖ ሃኖ'' ሄላ''ንዳኣና ኮዦ ሃይሶ ኬኤዚፆ ማዾ''ና ታኣና ዎላ'' ዒንሢ ማዔሢሮ ፆኦሲ ታ ጋላታኔ።

⁶ዬሱስ ኪሪስቶሴ ማዒ ሙካ ኬሎ''ና ኩንሣኒ ዬያ ኮዦ ማዾ'' ዒንሢና ማዻኒ ዓርቄ ፆኦዛሢ ሃሢያ ማዺሺ ዴዴዓንዳሢ ታ ጉሙርቃኔ።

⁷ታ ዒንሢ ዛሎ'' ዬያይዲ ማላንዳያ ኮይሳኔ፤ ዓይጎሮ ጌዔቴ ጎኔ ዒናፓ ታ ዒንሢ ናሽካያታሢሮኬ፤ ሃሣ ታ ዒንሢሮ ዬያይዲ ማላሢ ኮዦ ሃይሶ ዛሎ'' ዖኦጪንታ ባኮሮ ማሂ ታ ኬኤዛ ዎዶ''ና፤ ሃሣ ታ ሃይካ ቱኡዞ ማኣራ ኬኤዛኣና ዒንሢ ታኣና ዎላ'' ፆኦሲኮ ኮሹሞ ዒንጊፆ ዔካያ ማዔሢሮኬ።

⁸ዬሱስ ኪሪስቶሴ ዒንሢ ናሽካሢጉዲ ታኣኒያ ዒንሢ ናሽካያ ማዒ ዒንሢ ጶቂሣሢኮ ፆኦሲ ማርካኬ።

⁹ናሹማ ዒንሢኮ ዔራቶና ጶቂሥሢና ዓኣያ ማዒ፥ ዳልጊ ዳልጊ ዓኣዻንዳጉዲ ታ ፆኦሲ ሺኢቃኔ።

¹⁰ዬይ ዑሣ ዓኣዼ ኮዦ ባኮ ዱማሲ ዒንሢ ዔራንዳጉዲና ኪሪስቶሴ ማዒ ሙካ ኬሎ''ና ጌኤሺ፤ ሃሣ ቦሂሳ ባኣዚ''ያ ባኣያ ማዒ ዒንሢ ጴዻንዳጉዲኬ።

¹¹ያዒ ማዒፆና ዬሱስ ኪሪስቶሴ ዒንሢም ዒንጋ ፂሉ''ሞ ዓኣፖና ኩሚ ፆኦሲ ቦንቻያና ጋላታያ ዒንሢ ማዓንዳኔ።

¹²ታ ዒሾንሦ! ታ ሚሾንሦ! ታጊዳ ሄሌ'' ባካ ቢያ ኮዦ ሃይሶ ማዾ'' ባሼና ዳልጋንዳጉዲ ማሄሢ ዒንሢ ዔራንዳጉዲ ታ ኮዓኔ።

¹³ታኣኒ ቱኡቴሢ ኪሪስቶሴኮ ኮዦ ሃይሶ ኬኤዚፆ ዛሎ''ናታሢ ሮሜ ዓጮ'' ካኣቲ ማኣሮ ካፓ ዓሶንታ ሜሌ'' ዓሳኣ ቢያ ታና ዔሬኔ።

¹⁴ታ ቱኡቴቴያ ኪሪስቶሴ ጉሙርቃ፥ ታ ዒሾንሢና ታ ሚሾንሢናፓ ሚርጌዞንሢ ፆኦሲ ቃኣሎ'' ዒጊቹሞ ባኣያ ኬኤዛኒ ዳንዳዔኔ።

¹⁵ጋዓንቴ ፔቴ'' ፔቴ''ዞንሢ ኮዦ ሃይሶ ኬኤዛሢ' ቄኤሙሞና ዒፂሢ ዓያናናኬ፤ ዛላ'' ኬኤዛሢ ፒዜ ዒናፓኬ።

¹⁶ዬንሢ ኮዦ ሃይሶ ፒዜ ዒናፓ ኬኤዛዞንሢ ናሹሞና ኬኤዛኔ፤ ዔያታ ዬያ ማዻሢ' ታኣኒ ኪሪስቶሴኮ ኮዦ ሃይሶ ዛሎ'' ሞኦታንዳጉዲ ፆኦሲ ታና ዶኦሬሢ ዔራሢሮኬ።

¹⁷ሃንጎዋታ ኮዦ ሃይሶ ዎቢሲ ኬኤዛሢ ፔና ዼ'ግ ዼ'ጊዳኒ ዓኣ ማሊፆይዳፓ ዔቄያና ቱኡዞኮ ጊዳ'' ቃሲ'' ታና ሜቶ ሄሊ''ሳኒ ማሊኬ።

¹⁸ዬይ ያዺ ማዔቴያ ዬይ ቢያ ታና ዎዎዛሳኔ፤ ሴካ ቤርታ ዓኣ ዎዛ'' ታኣኮ ሃያኬ ጌይንቱዋያኬ፤ ዎይቲ ጌዔቴ ኮሺና ማዖም ፑርታ ማሊሢና ኪሪስቶሴኮ ኮዦ ሃይሳ ኬኤዚንታሢሮኬ።

¹⁹ሜሌ'' ሃሣ ታና ዎዛሳ ባካ ዒንሢ ሺኢጲፆና፤ ሓሣ ዬሱስ ኪሪስቶሴኮ ዓያኖ ጌኤዣ ታና ማኣዴ''ም ታኣኒ ቱኡዛፓ ቡሊ''ንታንዳሢ ታ ዔሬሢሮኬ።

²⁰ዬያሮ ዓይጎ ባኣዚ''ናኣ ታ ባሺንቲንዱዋኣሢ ጉቤ ዒናፓ ሃጊ ማዓንዳ ዎዛ ጌሢ ታ ጉሙርቃኔ፤ ዬያጉዲ ሃሣ ቤርታኣስካፓ ባሼና ሓሢ ታ ናንጌቴያ ሃይቄቴያ ታኣና ኪሪስቶሴ ቦንቺንታንዳጉዲ ማሃኒ ጫርሹሞ ታኣኮ ዓኣኔ።

²¹ዬያሮ ታኣኮ ናንጎ ጌይፃ፦ ኪሪስቶሴና ናንጊሢኬ፤ ታ ሃይቄቴያ ዑሣ ዓኣዼ ኮሺ ታኣም ማዓኔ።

²²ታኣኮ ኪሪስቶሴና ማዒ ናንጊፃ ዓኣፒ ማዾ ማዺሻያ ማዔቴ፥ ሃሢ ናንጊና ሃይቢናይዳፓ ዎኖ ታ ዶኦራንዳቴያ ታኣም ዔርቱዋሴ።

²³ዬንሢ ላምዖ ማሊፆንሢና ታ ሜታዻኔ፤ ፔቴ'' ዛሎ''ና ሃካ ናንጊፆይዳፓ ሃይቢና ዱማዺ፥ ኪሪስቶሴና ዎላ'' ታ ናንጋኒ ኮዓኔ፤ ዓይጎሮ ጌዔቴ ኪሪስቶሴና ማዒፃ ቢያፓ ባሼ ታኣም ማዔሢሮኬ።

²⁴ሜሌ'' ዛሎ''ና ዒንሢ ማኣዳ''ኒ ታኣኮ ሃካ ሳዓ ናንጊፃ ሚርጌ ኮይሳያ ማዔሢ ታ ዛጋኔ።

²⁵ታኣኮ ዬኖ ዛሎ'' ማሊፃ ባሼያ ማዔሢሮ ሃይቢዳፓ ታ ዓቲ'' ዒንሢና ዎላ'' ናንጋንዳሢ ታ ጉሙርቃኔ፤ ያዺ ማዔቴ፦ ኪሪስቶሴ ጉሙርቂ ዲጪሢና ዎዛና ዒንሢ ዴንቃንዳኔ።

²⁶ላሚ ዒንሢ ኮይላ'' ታ ሙካኣና ታ ዛሎ''ና ኪሪስቶሴና ዒንሢኮ ዓኣ ዎዞና ዒንሢ ሚርጌና ዎዛዻንዳኔ።

²⁷ዓካሪ ቢያፓ ባሼ ማዔ ባካ ዓይጎዳይ ጌዔቴ፦ ናንጋ ዒንሢኮ ኪሪስቶሴ ኮዦ ሃይሶ ጋላቲሳያ ማዓኒ ኮይሳሢኬ፤ ዬይ ያዺ ማዔቴ ታ ዒንሢ ሙኪ ዛጌቴያ ሃኬ ማዔቴያ ፔቴ'' ማሊሢና ዶዲ ዒንሢ ዔቃንዳሢንታ ኮዦ ሃይሶ ማዾ'' ዶዲ ዒንሢ ማዻንዳሢ ታ ጉሙርቃኔ።

²⁸ዓይጎ ባኣዚ''ናኣ ማዖም ዒንሢ ማዾ'' ማካ ዓሶ ዒጊጪፖቴ፤ ዬይ ዒንሢኮ ጫርሹማ ዔያቶም ባይሲንታ ማላታ ማዓዛ ዒንሢም ጋዓንቴ ዻቂንታም ፆኦሲ ዒንጌ ማላታ ማዓንዳኔ።

²⁹ኪሪስቶሴ ዛሎ'' ዒንሢ ሜቶ ዔካንዳጉዴያ ማዓንዳፓዓቴም ዒዛ ጉሙርቃንዳጉዲ ሌሊ ሃይ ፆኦሲኮ ኮሹሞ ዒንጊፆ ማዻ'' ዒንሢም ዒንጊንቲባኣሴ።

³⁰ዬያሮ ሃሢ ዒንሢ ታኣና ዎላ'' ሜታዻያ ማዔኔ፤ ዬይ ሜታሢ ሃያኮ ቤርታ ታና ሄሌ''ሢና ሃሢያ ታኣኒ ሜታሢዳ ዓኣሢ ዒንሢ ዋይዛሢኬ።