1O Pavol the o Timoteus, o sluhi le Ježišoskere Kristoskere, pisinas savore sentnenge andro Ježiš Kristus, save hine andro foros Filipi, the le vodcenge upral o zbori the le dijakonenge.
2O lačhipen (milosť) tumenge the o smirom le Devlestar, amare Dadestar, the le Rajestar le Ježišostar Kristostar.
3Paľikerav mire Devleske, kecivar mange ča pre tumende leperav;
4andre dojekh miri modľitba man modľinav furt radišagoha vaš tumenge savorenge,
5bo pomožinenas mange andre le evaňjelioskeri služba ešebne (perše) dživesestar dži akana.
6Vašoda pačav, hoj o Del dokerela e lačhi buči, so andre tumende chudľa te kerel, dži andre oda džives, sar o Ježiš Kristus avela pale.
7Me mange oda šaj gondoľinav pal tumende savorende. Se san mange andro jilo, bo tumen savoren hin kotor manca pre le Devleskero lačhipen (milosť), či som akana andre bertena, vaj akor, sar braňinahas a zoraľarahas o evaňjelium.
8O Del hino švedkos, sar mange hin pharo vaš tumenge savorenge le Ježišoskere Kristoskere kamibnaha.
9A modľinav man vaš oda, hoj tumaro kamiben te barol buter a buter, hoj te prindžaren o čačipen a mištes te achaľon
10a te džanen mištes te rozsudzinel, so hin nekfeder. Modľinav man, hoj te aven žuže the bi o binos andre le Kristoskero Džives
11a hoj te presikaven o dživipen, so hin pherardo le čačipnaha, so avel prekal o Ježiš Kristus – pre slava the pro lašariben le Devleskero.
12Phralale, kamav, hoj te džanen, hoj oda, so pes mange ačhiľa, pomožinďa le evaňjelioske.
13Savore slugaďa andro palacis the savore aver džene pes dodžanle, hoj som phandlo andre vaš o Kristus.
14Oda, hoj som andre bertena, zoraľarďa but phralen andro Raj, hoj mek zoraleder a bi e dar te vakeren o Lav.
15No varesave phrala kazinen pal o Kristus, bo hin len zavisť a ispiden pes anglal, ale aver džene kazinen pal o Kristus lačhe jilestar.
16On oda keren kamibnastar, bo džanen, hoj kade som vašoda, hoj braňinav o evaňjelium,
17no aver džene kazinen pal o Kristus, bo kamen pes te ispiden anglal a na keren oda žužes, bo peske gondoľinen, hoj mange kerena buter pharipen andre bertena.
18Ale so paloda? Či imar pes kazinel kavke abo kavke – či kamukeri vaj andro čačipen – pal o Kristus pes kazinel. Oleske radisaľuvav a mek radisaľuvava,
19bo džanav, hoj oda hin mange prekal o spaseňje prekal tumare modľitbi the prekal e pomoca le Duchoskeri le Ježišoskero Kristoskero.
20Igen pre oda užarav a mukav man pre oda, hoj man andre ňisoste na ladžava. Pačav, hoj leske služinava bi e dar, hoj o Kristus ela barardo andre miro ťelos avke, sar furt the akana – či imar dživava, vaj merava.
21Bo mange o dživipen hin o Kristus a te merel hin pre chasna.
22Ale te dživava andro ťelos, oda ela pre chasna la bučake, vašoda na džanav te phenel, so mange kidňomas avri.
23Cirdel man pro soduj seri: Kamav te merel a te avel le Kristoha, bo ada mange uľahas nekfeder;
24ale prekal tumenge hin feder, hoj te ačhav andro ťelos.
25Aleske pačav a džanav, hoj ačhava a avava tumenca savorenca pre tumaro lačho the radišagos andro pačaben.
26Avke tumen mek buter šaj lašarena manca andro Ježiš Kristus, sar avava pale ke tumende.
27Ča dživen avke, sar oda tumenge phenel le Kristoskero evaňjelium. Či imar avava a dikhava tumen, vaj na avava, kamav te šunel pal tumende, hoj ačhen zorales andre jekh duchos a jekhetane pes maren vaš o pačaben le evaňjelioskero.
28Ma daran olendar, save pre tumende džan! Kada ela znameňje, hoj on ena zňičimen a hoj tumen avena zachraňimen le Devlestar.
29Bo tumenge hin dino le Devleskere lačhipnastar (milosťatar), hoj na ča te pačan andro Kristus, ale hoj tiš te cerpinen vaš leske.
30Se the tumen san andre ajso mariben, sar dikhľan paš ma a pal savo the akana šunen, hoj man marav.
