Ola Saam 96:4-13

⁴YAWEI det trubala God im haibalawan en pipul garra preisim im. Pipul garra abum loda rispek blanga im, mowa den langa ola najalot drimin.

⁵Detlot drimin blanga najalot kantri olabat laiyawan, weya pipul bin meigimbat, bat YAWEI det trubala God bin meigim ebrijing langa skai.

⁶Im brabli haibala pawa gaburrumap im raidaran. Im brabli shainiwan lait en pawa jidan langa im Serramoni Pleis.

⁷Ola pipul langa dijan wel preisim YAWEI det trubala God. Preisim im haibalawan pawa.

⁸Preisim det haibala neim blanga YAWEI. Bringim ofring en kaman langa im Serramoni Pleis.

⁹Ebribodi langa dijan wel garra meigim miselp lobala en weship langa YAWEI det brabli haibalawan.

¹⁰Dalim pipul langa ola kantri, “YAWEI im boswan! Dijan graun im jidan langa im rait pleis en najing kaan mubum im. Im garra jadjim ola pipul en gibit olabat feyago.”

¹¹Graun en skai, jidan gudbinji. Solwoda en ola enimul weya jidan insaid langa solwoda jingat gudbinjiwei.

¹²Ola kantri en ebrijing weya jidan langa olabat, jidan gudbinji. Ola tri langa ola bush kantri sing gudbinjiwei.

¹³Wen YAWEI kaman blanga jidan boswan langa dijan wel, im garra jidan bos blanga ola pipul brabli trubalawei, en det wei weya im gibitbat pipul feyago.