Ola Saam 95:2-10

²Wi garra kaman langa im en tok theingkyu, en preisim im garram ola hepiwan song.

³YAWEI im det brabli haibalawan God. Im haibala bos langa ola najalot drimin.

⁴Im jidan bos blanga dijan wel. Im bos blanga ebrijing brom ola dipwan keib raidap langa ola haiwan hil.

⁵Im bos blanga solwoda en dijan graun weya imbin meigim imselp.

⁶Kaman yumob! Wi garra nildan langa im en weship im. Wi garra nildan langa YAWEI det trubalawan God hubin meigim wi.

⁷Im na wi God, en wi na detlot pipul im oldei lukaftumbat, en wi jis laik ola ship blanga im weya im oldei gibit ebrijing. Irrim tudei wanim YAWEI tok,

⁸“Nomo jadimap miselp hat wulijim yumob femili olabat bin dum bifo langa det kantri Meriba, en det taim langa Mesa det deset kantri.

⁹Deya na deibin oldei grambulbat en aibin gitwail langa olabat. Dei nomo bin jinggabat wanim aibin oldei dumbat blanga olabat.

¹⁰Blanga 40 yiya ai nomo bin gudbinji langa detlot pipul. Aibin tok, ‘Olabat nomo garram eni rispek blanga mi. Olabat nomo teiknodis langa ol main lowa.’