Ola Saam 89:30-52

³⁰“Bat if olabat nomo teiknodis en bulurrum ol detlot lowa blanga main,

³¹en if olabat nomo dum wanim ai dalim olabat,

³²wal ai garra panishim olabat blanga olabat nogudbalawei. Ai garra meigim olabat ardimbat blanga olabat nogudbalawei.

³³Bat ai kaan stap laigimbat Deibid, en ai garra kipum main pramis langa im olagijawan.

³⁴Ai kaan breigim main strongwan pramis langa im, o deigimbek eni pramis aibin meigim langa im.

³⁵“Trubala dijan na det pramis aibin meigim garram main ronwan seikridwan neim. Ai kaan dalim laiya langa Deibid.

³⁶Im femili lain garra kipgon olagijawan. En ai garra oldei maindimbat det kantri weya im jidan bos wulijim det san weya im oldei shain olataim.

³⁷Im garra jidan olagija jis laik det mun, weya im jidan trubalawan witnis blanga mi langa skai.”

³⁸Bat YAWEI, yubin gitwail langa det king weya yubin pikimat. Yubin libum im miselp en yu nomo wandi sabi im enimo.

³⁹Yubin breigim yu strongwan pramis garram yu wekinmen, en yubin tjakamdan im speshalwan het langa graun.

⁴⁰Yubin breigimap ola wol blanga im taun, en yubin libum ol im strongwan haus breikinwan.

⁴¹Enibodi hubin wokpas langa det pleis bin stilim ebrijing blanga im. En ola pipul langa ola gulijapwan kantri bin mokimbat im.

⁴²Yubin meigim im enami olabat bidimbat im, en yubin meigim olabat holot gudbinji nomo lilbit.

⁴³Yubin meigim nogud ola wepan blanga det king, en im nomo bin win wen imbin fait.

⁴⁴Yubin deigidawei im speshalwan stik weya im oldei holdim, en yubin nokamdan im speshalwan tjeya langa graun.

⁴⁵Yubin meigim im olmen na, bat im oni yangbala, en yubin meigim im jidan garram sheim.

⁴⁶YAWEI, haulong yu garra haidim miselp? Haulong yu garra barn binji wulijim faiya weya barn?

⁴⁷Yu jinggabat na. Main laif kaan jidan longtaim. Yubin meigim pipul blanga dai.

⁴⁸Nobodi kaan jidan laibala en neba dai. Nobodi kaan stapam miselp brom daidaibat.

⁴⁹YAWEI, weya det filing yubin abum bifo blanga laigimbat pipul olagijawan? Weya ola pramis yubin meigim langa Deibid?

⁵⁰YAWEI, yu sabi hau ol detlot hu nomo weship yu oldei mokimbat en meigimbat fan langa mi, yu wekinmen.

⁵¹YAWEI, yu enami olabat tok nogudwei langa yu king weya yubin pikimat. Ebriweya im go dei tok nogudwei blanga im.

⁵²Preisim YAWEI det trubala God olagijawan. Yuwai! Trubala!