Ola Saam 49:5-14

⁵Ai nomo bradin wen mi langa deinja, en wen ola enami jidan raidaran langa mi.

⁶Olabat oldei trastimbat ebrijing dei garram, en tok praudwei blanga olabat ebrijing.

⁷Wi kaan meigim miselp fri, en wi kaan peiyim God blanga wi laif,

⁸dumaji im brabli diyawan blanga peiyim blanga pipul laif. If wi bina peiyim, stil tharran nomo bina naf

⁹blanga kipumwei wi brom det greibyad, en blanga larram wi jidan laibala olagijawan.

¹⁰Ebribodi sabi klebawan pipul dai, en medwan en siliwan pipul ol dai du, en olabat libum olabat ebrijing langa olabat femili.

¹¹Olabat ronwan greib jidan olabat kemp. Deya na dei garra jidan olagijawan, nomeda deibin abum dei ronwan kantri basdam.

¹²Nomeda pipul jidan ritjwan, olabat garra stil dai jis laik ola enimul.

¹³Yu luk wanim garra hepin langa detlot hu oldei trastimbat olabat ronselp, en hu oldei laigim blanga jidan brabli ritjwan.

¹⁴Olabat garra dai jis laik ship, en deth garra jidan stakmen blanga olabat, en im garra deigim olabat streit langa greib. Olabat bodi garra go nogudwan langa det wel weya ola ded pipul jidan.