Ola Saam 18:1-36

¹YAWEI, brabli trubalawei mi laigim yu. Yu na meigim mi strongbala.

²YAWEI oldei lukaftumbat mi, jis laik wen ai go langa seifwan haus, En wen mi oldei abum trabul, mi oldei go langa im, dumaji im jis laiga strongbala ston weya ai gin blandim miselp brom main enami olabat. Main God oldei maindimbat mi wen ai go langa im, en im oldei seibum mi brom main enami olabat jis laik det shild weya oldei stapam enibodi brom kilim sambodi.

³Wen mi jingat langa YAWEI im oldei seibum mi brom main enami olabat. Wal wi kaan preisimbat enibodi, oni YAWEI det trubala God.

⁴Aibin abum bigis trabul, en aibin gulijap dai, dumaji main enami olabat bin raidaran langa mi. Imbin jis laik solwoda bin raidaran langa mi redi blanga binijimap mi.

⁵Deth bin ebriweya raidaran langa mi. Imbin jis laik det greibyad bin redi blanga gajulum mi.

⁶Bat aibin jingat langa YAWEI det trubala God. Aibin jingat langa main God blanga album mi. En imbin irrim mi deya langa det seikridwan pleis blanga im, en imbin irrim langa mi wen aibin jingat langa im blanga album mi.

⁷Wal ola graun bin sheiksheik. Nomo lilbit ola graun ebriweya bin mubmub, dumaji God bin gitwail langa im enami olabat.

⁸Imbin jis laik imbin meigim smok kamat brom im nos, en imbin jis laik imbin meigim brabli hotwan faiya kaman brom im mawus weya garra barnimap im enami olabat.

⁹Imbin jis laik imbin breigimap det skai ontop, en imbin kamdan garram dakwan klaud andanith langa im fut.

¹⁰Kwikbala imbin kaman jis laik imbin flai garram det speshalwan einjul blanga im, en imbin trebul langa det win jis laik imbin abum wing.

¹¹Imbin jis laik imbin gaburrumap miselp garram det dakbala klaud, en det reinklaud ful garram woda bin raidaran langa im,

¹²en ola laitining bin flesh en ola heilston bin buldan, en det brabliwan lait blanga im bin shain thru detlot klaud.

¹³Afta na YAWEI bin jingat brom ontop jis laiga thanda, en ebribodi bin irrim det brabli haibala God bin jingat,

¹⁴en brabliwei imbin bidim detlot enami blanga im. Imbin jis laik imbin shudum olabat garram bo en erro en meigim olabat ranawei. Imbin jis laik imbin tjakamdan laitining langa olabat en meigim olabat go ebriweya.

¹⁵Wen YAWEI bin gitwail langa im enami olabat, dei kaan blandim miselp brom im, dumaji im brabli strongbala. En wen imbin jingat, im strongwan wed bin kadimat det solwoda blanga shoum ola meinwan pat weya holdimap dijan wel.

¹⁶Wal YAWEI bin irrim mi wen aibin jingat langa im blanga album mi, en imbin jis laik imbin pudumdan im bingga brom top en gajulum mi, en imbin pulumat mi brom det trabul weya aibin abum.

¹⁷Imbin seibum mi brom ol detlot enami blanga main. Imbin seibum mi brom ol detlot strongbala pipul hu nomo bin laigim mi.

¹⁸Wen aibin abum det trabul, ol detlot pipul bin oldei trai en gajulum mi. Bat YAWEI det trubala God bin oldei maindimbat mi.

¹⁹Imbin oldei album mi wen aibin abum det trabul, en imbin seibum mi, dumaji imbin gudbinji langa mi.

²⁰Wal YAWEI bin gudbala langa mi, dumaji mi oldei bulurrumbat det raitwei blanga im. En imbin tok gudbalawei langa mi, dumaji ai garram klinwan bingga, en nomo bin dum enijing rong.

²¹Aibin oldei duwit langa det lowa blanga YAWEI det trubala God, en ai nomo bin tenim miselp brom main God.

²²Aibin oldei jinggabat ol detlot lowa blanga im, en ai nomo bin gibit bekboun langa det lowa blanga im.

²³En im sabi mi jidan nomo garram enijing rong. En im sabi ai nomo oldei dumbat nogudbala ting.

²⁴En blanga tharran na imbin gudbala langa mi, dumaji aibin oldei bulurrumbat det raitwei blanga im, en im sabi ai nomo bin dum enijing rong.

²⁵Wal YAWEI, yu na det trubala God, en yu oldei jidan trubala langa detlot pipul hu jidan trubala langa yu, en yu oldei gudbala langa detlot pipul hu jidan nomo garram enijing rong.

²⁶Yu oldei gudbala langa detlot pipul hu jidan gudbala. Bat yu oldei nogudbala langa detlot pipul hu jidan nogudbala.

²⁷En yu oldei meigim detlot pipul hu meigim miselp haibala jidan lobala. Bat yu oldei seibum detlot pipul hu nomo meigim miselp haibala.

²⁸Wal YAWEI, yu na det trubala God, en yu jidan jis laiga lait blanga mi. En wen mi jidan nogudbinji, im jis laik mi jidan langa dakbala pleis. Bat yu oldei andimwei det dakbala en meigim mi jidan gudbinji.

²⁹En nomeda main enami olabat bigmob, bat stil yu oldei meigim mi strongbala blanga fait langa olabat. En nomeda olabat brabli strongbala, bat stil yu oldei gibit mi pawa blanga bidim olabat.

³⁰Wal ol yumob pipul, det wei blanga God im brabli gudwan, en yumob gin trastim detlot wed weya imbin tok. YAWEI im jis laiga shild blanga detlot pipul hu askim im blanga album olabat.

³¹Wal nobodi God. Oni YAWEI na God. En oni im na garram pawa blanga maindimbat wi.

³²Im na oldei meigim mi strongbala, en im na oldei opinimap det wei blanga mi,

³³en im oldei kipum mi seifwan wen mi ran kwikbala langa hil kantri wulijim det diya, en im oldei meigim mi kipgon jidanbat seifwan langa haibala pleis.

³⁴Ai sabi hau blanga fait langa main enami olabat en bidim olabat, dumaji YAWEI na bin lenim mi blanga fait.

³⁵Wal YAWEI, yu na det trubala God, en yu oldei lukaftumbat mi en seibum mi brom main enami olabat. Yu na bin oldei album mi en meigim mi haibala,

³⁶en yu nomo bin larram main enami olabat grebum mi, en yu nomo bin larram mi buldan du.