SAM 18:1-36

¹Anutu, na gae banip gwaang siknga nataat. Gata na atapi kekekanggat.

²Buyambam tapana damanu kekeknga gwenu unin. Sike i suu gwenduta binga, na takusopunggak. Sike ita na iwanae katune sandeke tanggak kapanin. Sike natane Anutuna suu kekeknga gwendu binga, nata ie kuke iwanae akusopunggat. Buyambam tapana tiunggu daka binga, ita na iwanae atakusopunggak. Siwan na inane kekeknga akngane sandeke tapan na kekeknga yuat. Sike i natane damanu kekeknga gwena unin.

³Buyambam tapatane umana kopsa aknga unin. Nata ie tumuk wam iniwa gatangaman natane iwanata dua tasiwan maiwit.

⁴Na akupitde wesimu asikum. Sike wa nau takngatuta binga kekeknga wamanggaganuwan yukum. Siwan wai aminda na nuwa maiwitde kumzang tasikaing. Gatu wa tasikaingu yanggabam gwendane sambuyata binga enake na usukwatapik.

⁵Ngan, nau takngatuta binga kekeknga wamanggaganuwan nata kupitde wesim sikum. Ngan, bungep pasike kaap zong pakaing binga na nuwan kupitde dapaknga siwan datakunanga dua sikum.

⁶Na meya waakwak natake Buyambam tapae sitawakum. Na Anutunata akgatangamikge natake nata ie tumuk wam inikum. Ita inane yotna buyambam gwene yuke natane tumuk wama natapbut. Ngan, ita natane tumuk wama maakngata natapbut.

⁷Siwan, Buyambam tapata musia toknga natane iwanae natapbut. Natapan miamunu buyambam siawan, tawan dakandaka ama yapiatangu ayamuke yuking.

⁸Ngan, musia toknga natapan kupan taknga Buyambam tapatane nomna ganang epuwawan gatu katau genaatangga akoke sangabamu kwaapzang yasiking. Ngan, ita musia toknga natake tasiwan katapaimu mumuyang buyak genaneta epu kuking.

⁹Ita minga musa kwasiwan kuwan yekau teke epuke minga zikaa musa tasiwan inane kepinae gepbiatang yukut.

¹⁰Unzing angela tapatuta binga gwaamuke bepmake apbut. Sike wa apunggau got taknga kwaitdane pia kaamangga binga Anutu masene teke zeetgaman bepmake takapbut.

¹¹Ita tasiwan zikaandaka sel you gwendu binga dakngawan undang kusopukut. Ngan, sopatane minga zikaa kaamang bingata takusopukut.

¹²Siwana undangga kakaa siknga aknga sikut. Siwan minga musaatangga kakaa aknga uneta epbing. Epuwawa yapasikga asiwawan gatu zambum mupewan epbing.

¹³Buyambamtapa yekaune yuke gakngatda binga kaapmapa kumzang yakut. Ngan, waapa kopsa siknga apata kaapmapa wamna yakapan aminu kepna kepna nana kuupbamda atnatapbing.

¹⁴Ita sakutda yamawawan iwana gwatdu gwatdu datakuking. Ngan, ita tasiwan yapasiu kekeknga siknga sakutna dakngawan iwana yamnangge pasiwan gwatdu gwatdu datakuking.

¹⁵Buyambam tapa, gata iwandae kaanga yanike nombata tasiwi gou kekeknga puyawawan yanggabam gwenu ikopewan pimaking. Ikopewan pimapan keu yanggabam amunane kutakngi yuak kaknga anggaman sikut. Sike yanggabam gwenu gatukande zakngakut. Zakngawan sanga kundu kepdaka tapan kekekanggau kakaa siking.

¹⁶Ita yekaune yuke kataknga tewan epan na gatuna takut. Na yanggabam gwenda asusukwatapan ngana ita na akaiwan akopbum.

¹⁷Natane iwana kekeknga siknga. Ge nata yapbitnanga dua. Siwan ngana Buyambam tapata na iwanae kataune sandeke takut.

¹⁸Ngan, nata tapduu wai yukum komune iwanata nae apu amak tasiking. Siwan ngana Buyambam tapata na akgatangamukut.

¹⁹Ita gatangamuke nanitakuwan nata keu aanggaman komune take yukum. Sanga gwautnanga aknga wena sikut. Dasingge, ita nae musip gwaang natangamuke na gatuna takut.

²⁰Nata gutonga takngatu dua tasiwa nanduke Anututa naenu take tasikut. Ngan, nata kepi noman taknga tawamba nanduke Buyambam tapata sanga gwaamu kwaapzang namukut.

²¹Nata Buyambam tapatane mama wamu take tawakum. Nata Anutunae masa dua imukum. Aho, wai waaknga dua tasikum.

²²Ngan, nata asinggan itane mama wamdekan natanggamatakum. Siwan nata itane wamu take akngae yamandeu dua sikum.

²³Unzingge ita atnataak. Na ie gutonga takngatu wena. Nata kepi sukukumu katak siknga tanggwaukum. Gutonga takngatu tasiat nganggen.

²⁴Buyambam tapata natane noman taknganae natayukut. Natangamuke yake yuyuu take aknga namukut. Minae, nata ie kaine dundumna yukum.

²⁵Buyambam tapa, aminu tapatuta masa gae dua gamanu gakaa yake gata masa dua imiyak. Sike aminu tapatuta noman takngakan tawake tasike gutonga takngatu dua tasiwanu, gataaya yake ie noman takngakan tasingamunggayak.

²⁶Sike aminu tapatuta noman akngaekan ba tawambanu, gata noman taknga yake tasinggamuya. Siwan ngana aminu tapatuta gutonga aknga tawake tasiwanu, gata kepi waakngae yapii katak siknga kake yake meya aknga asiimunggayak.

²⁷Gata aminu ninu kopsa amin dua dakngake yuamang ngang yakaing aminu apanggayak. Sike kundu ninu kopsa amin dakngake yuamang ngang yake umana yapangenakaing aminu, gata umana ayaipakepunggayak.

²⁸Buyambam tapa, gata kakaa aknga namunggayak. Ngan, Anututa zikaa naatang yuak kaknga atawamban kunggak.

²⁹Anutu, gata akgatangaminu nata amak tasike iwana ayaipakepu pewit. Ngan, Anututa kekeknga namanu nata damanu yot gapma takumbasikuu ayatupit.

³⁰Anututane yuyuknga aknga take siknga siwan noman gan. Sike ita sanga takngatu tasinangge yanggau, siakan gan siknga yanggak. Gatu Buyambamtapa tiunggu amak tasiya daka binga. Ita aminu ie kukaingu akgatayamuke iwanata dua kaningge apakusopunggak.

³¹Buyambam tapakan i Anutu siknga. Asikaya Anutu tapatuat ba dasing? Ita ninu suu buyambam gwenduta binga wamambasinggak.

³²Anututakan tasiwan na kekeknga yuat. Gatu ita kepi sukunggau kuut gatangamuke nanduyuawan kepi noman akngane sukunggat.

³³Ita katak siknga nanduyuwawan na dua pimanggat. Unzing kaap zongga tawan dakandakaatang sukuke kepi katak kake sukuaing binga.

³⁴Gatu ita amak tasinanga akngae nanindamukgak. Unzing tasiwan kataknga kekeknga siwana kweemu kekeknga siknga kaiwa dandakawik.

³⁵Buyambam tapa, gata na gatangami nata tiunggu take iwana ayapbimbit. Unzing gata iwanda ayapbikgayak. Gata katakga siaapane tapi kekeknga yuat. Siakan, gata na gatangami aminu kuupbamde kaine umana kaapa dakngake yuat.

³⁶Gata kepi nata sukunggat tapa tanomanuwi kepi waapane kuke saweknga dua nuwan pimanggat.