Ola Saam 144:7-15

⁷Yu kamdan brom hebin en lidimap mi brom dijan dipwan woda en seibum mi. Seibum mi brom det pawa blanga detlot pipul brom naja kantri.

⁸Olabat nomo tok trubalawei. Olabat reken dei tok trubalawei, bat najing. Olabat oldei dalimbat laiya.

⁹YAWEI ai garra sing nyuwan song langa yu. Ai garra plei gita en sing song langa yu.

¹⁰YAWEI yu meigim ola king win, en yu seibum yu wekinmen Deibid.

¹¹Seibum mi brom det pawa blanga detlot pipul brom naja kantri. Olabat nomo tok trubalawei. Olabat reken dei tok trubalawei, bat najing. Olabat oldei dalimbat laiya.

¹²Larram ola yangwan san blanga melabat jidan wulijim tri weya growap strongbala. Larram ola doda blanga melabat jidan wulijim ola brabli purdiwan pos weya jandap langa ola kona blanga det king haus.

¹³Larram melabat stowahaus jidan fulwan garram olkainaba daga. Larram ola ship langa melabat fam abum detmatj lilwanlilwan ship.

¹⁴Larram ola buligi blanga melabat abum detmatj gabigabi gudwei en nomo lujimbat. Nomo larram enibodi jidan soribala en kraikrai langa ola roud blanga melabat.

¹⁵Detlot pipul langa det kantri na garra jidan gudbinjiwei dumaji dijan na im trubala. Detlot pipul hu weship YAWEI det trubala God garra jidan brabli gudbinjiwei.