Mboe 144:7-15

⁷Pa iŋgi kembei wo mburaanaŋana ikamam be isur yo ma aŋla leŋ i. Tana nomom su mi maata yo ma aŋse. Uulu yo, mi tatke yo pizin wal ta timar pa toono toro na naman.

⁸Wal tana, kwon pakamkaamŋan. Tiwit naman woono isala be tipombol sua kizin mbukŋana ma imbol kat. Tamen tito sua kizin som.

⁹O Anutu, nio ko aŋbo mboe popoŋana pu, mi aŋse kombom be aŋpakuru.

¹⁰Pa nu ta uluulu zin king tiam Israel ma tiliplip pa kan koi bizin. Nu kamkewe mbesooŋo ku Dabit ziŋan popoŋana kini.

¹¹Piŋgis zaaba pio, mi tatke yo pa zin wal ta timar pa toono toro na naman. Wal tana, kwon pakamkaamŋan. Tiwit naman woono isala be tipombol sua kizin mbukŋana ma imbol kat. Tamen tito sua kizin som.

¹²Lutuyam bizin ko titum ma tiwe bibip, kembei ke popoŋan. Mi lutuyam moori bizin ko ruŋgun ambaimbaiŋan kembei gungun ta tisap koroŋ kunun ila bekena tipeŋgeeze king ruumu kini.

¹³Mi diditu tiam ko bokbok pa kini matakiŋa, mi sipsip mi mekmek tiam timasak ma tiwe munŋaana ma munŋaana ka tieene.

¹⁴Mi makau tiam ta kembena. Mete sa ko irao ikam zin na som. Ko tumŋan, mi tipepeebe ambai men ma tiwe boozo kat. Mi ko teleŋ tiŋiizi sa isu kar keteene som.

¹⁵Zin wal ta so kampeŋana ta kembei imbotmbot se kizin, nako lelen ambai kat. Mi ina zin wal ta timbesmbeeze pa Yooba. Tana zin ta ko lelen ambai. Pa kampeŋana kini ko imbotmbot se kizin.