Ola Saam 119:55-153

⁵⁵YAWEI, wen im naitaim mi jinggabat langa yu en blanga yu lowa.

⁵⁶Mi jidanabat brabli gudbinjiwei dumaji mi oldei teiknodis langa yu wed.

⁵⁷YAWEI oni yu na wanbala mi wandim. Mi pramis blanga lisin en duwit langa ol detlot lowa blanga yu.

⁵⁸Mi askim yu brabliwei brom insaid langa main hat blanga sori langa mi jis laik weya yubin pramis.

⁵⁹Aibin jinggabat blanga ola ting weya aibin dumbat, en mi pramis blanga bulurrumbat yu wei.

⁶⁰Wen yu tok, streidawei mi dum wanim yu wandim.

⁶¹Detlot brabli nogudbala pipul bin pudum trep blanga mi, bat ai nomo bin fogedabat yu lowa.

⁶²Mi gidap midulnait blanga preisim yu, dumaji wen yu jadjimbat pipul, yu gibit olabat feyago.

⁶³Mi jidan fren blanga ol detlot pipul hu bulurrum yu, en teiknodis langa detlot lowa blanga yu.

⁶⁴YAWEI, yu garram det filing blanga oldei laigim pipul langa ola kantri. Yu titjimbat mi blanga ol detlot lowa blanga yu.

⁶⁵Yubin kipum yu pramis YAWEI, en yu jidan brabli gud langa mi, yu wekinmen.

⁶⁶Meigim mi sabi ebrijing gudwei, dumaji mi trastim detlot wed blanga yu.

⁶⁷Basdam aibin oldei dum rong ting, bat yubin streitinimap mi en tudei mi teiknodis langa yu wed na.

⁶⁸Yu brabli gudwan YAWEI en yu brabli kainbalawan du. Yu lenim mi detlot lowa blanga yu.

⁶⁹Ola praudbala pipul bin dalimbat ola laiyawan stori blanga mi, bat mi teiknodis langa detlot lowa blanga yu brabliwei brom insaid langa main hat.

⁷⁰Detlot pipul nomo sabi enijing, bat mi oldei gudbinji langa ol yu lowa.

⁷¹Wen yubin streitinimap mi blanga main nogudbalawei, tharran na bin brabli gud ting blanga mi. Imbin meigim mi len ola lowa blanga yu.

⁷²Bigmob mani langa dijan wel nomo enijing langa mi. Oni detlot lowa blanga yu na jidan nambawan langa main laif.

⁷³YAWEI, yubin meigim mi en yu oldei kipum mi seifwan. Meigim mi sabi brabliwei wulijim ai garra len detlot lowa blanga yu.

⁷⁴Ol detlot pipul hu rispek yu garra gudbinji wen olabat garra luk langa mi, dumaji mi trastimbat langa yu wed.

⁷⁵Ai sabi ol yu lowa nomo garram enijing rong en im brabli trubalawan, YAWEI. Yubin panishim mi brabliwei dumaji yu brabli trubalawan.

⁷⁶Larram yu ron filing blanga laigimbat, meigim mi gudbinji, jis laik yubin pramisim mi, det wekinmen blanga yu.

⁷⁷Yu sori langa mi en larram mi jidan laibala, dumaji mi laigim teiknodis langa detlot lowa blanga yu brabliwei.

⁷⁸Larram detlot praudbala pipul sheim miselp dumaji olabat oldei dalimbat laiya stori blanga mi, bat mi, ai garra duwit langa wanim yu titjimbat mi.

⁷⁹Larram ol detlot pipul hu rispek yu kaman langa mi blanga sabi ol yu lowa.

⁸⁰Meigim mi teiknodis langa ol yu lowa brabliwei wulijim ai kaan sheim blanga dum enijing.

⁸¹YAWEI, mi brabli wikwan na brom weidabat blanga wotaim yu garra seibum mi, bat mi trastimbat oni langa yu wed.

⁸²Mi nokap brom weidabat blanga wanim yubin pramisim. Mi askim yu, “Wotaim yu garra album mi?”

⁸³Mi brabli olwan en kaan wek enimo, jis laiga olwan letha but weya nobodi kaan yusum enimo, bat stil ai nomo bin fogedabat detlot lowa blanga yu.

⁸⁴Haulong ai garra weidabat? Wotaim yu garra panishim ol detlot pipul hu oldei dumbat nogudbala ting langa mi?

⁸⁵Detlot praudbala pipul hu nomo teiknodis langa yu lowa bin grajim dipwan hol blanga trepam mi.

⁸⁶Detlot lowa blanga yu, olabat trubalawan. Ola pipul gibitbat mi adtaim garram ola laiyawan stori. Yu album mi, YAWEI.

⁸⁷Olabat bin gulijap kilim mi ded, bat ai nomo bin fogedabat detlot lowa blanga yu.

⁸⁸YAWEI, dumaji yu kipgon laigimbat pipul detmatj, wal yu nomo larram mi dai wulijim ai garra teiknodis langa ol yu lowa.

⁸⁹YAWEI, blanga yu wed garra jidan olagijawan. Im olagijawan deya langa hebin.

⁹⁰Det trubalawei blanga yu im kipgon olagijawan. Yubin meigim dijan wel blanga jidan langa im raitwan pleis, en im jidan lagijat olagijawan.

⁹¹YAWEI, garram yu ronwan wed yubin meigim ebrijing en olabat jidan tudei, en ebrijing na wek laik yubin tok.

⁹²If ai nomo bina abum detlot lowa blanga yu blanga meigim mi gudbinji, ai bina dai brom main trabul.

⁹³Ai nomo wandi libum detlot wed weya yubin titjimbat mi, dumaji olabat meigim mi jidan gudbalawei.

⁹⁴Mi blanga yu YAWEI. Yu seibum mi, dumaji mi oldei teiknodis langa ol yu lowa.

⁹⁵Ola brabli nogudbala pipul weidabat blanga kilim mi ded, bat ai garra kipgon jinggabat ol yu wed.

⁹⁶Ai sabi ebrijing weya jidan tudei garra binij, bat yu lowa im jidan brabli trubalawan en kaan neba binij.

⁹⁷Trubala mi laigim detlot lowa blanga yu brabliwei. Mi oldei jinggabat detlot lowa blanga yu.

⁹⁸Dumaji ai garram yu lowa blanga shoum mi wanim blanga dum, im meigim mi sabi brabliwei, mowa den main enami olabat. Dei nomo sabi enijing.

⁹⁹YAWEI, ai sabi mowa den main titja olabat, dumaji mi jinggabat wanim yu oldei titjimbat mi.

¹⁰⁰Mi sabi mowa den detlot ol pipul, dumaji mi oldei duwit langa detlot lowa blanga yu.

¹⁰¹Ai nomo bulurrum det nogudbalawei, dumaji ai wandi duwit langa yu wed.

¹⁰²Ai nomo bin libum detlot lowa blanga yu dumaji yu na main titja.

¹⁰³Detlot shugabeig, olabat switwan, bat detlot lowa blanga yu, olabat brabli switwan.

¹⁰⁴Detlot lowa blanga yu meigim mi sabi blanga ebrijing. Blanga tharran na mi nomo laigim ola nogudbalawei.

¹⁰⁵YAWEI, yu wed im shain laiga lait blanga shoum mi det wei blanga go, en im laik det lait weya im totjim main roud.

¹⁰⁶Ai garra kipum main pramis langa yu blanga teiknodis langa detlot trubalawan lowa blanga yu.

¹⁰⁷Mi ardimbat brabliwei brom main enami olabat. YAWEI, yu nomo larram mi dai, jis laik yubin pramis.

¹⁰⁸YAWEI, irrim main preya weya mi tok theingkyu langa yu, en lenim mi ol detlot lowa blanga yu.

¹⁰⁹Mi oldei jidan redi blanga go thru langa trabul nomeda wanim hepin langa main laif. Ai nomo fogedabat ol yu lowa.

¹¹⁰Ola brabli nogudbala pipul meigim trep blanga mi, bat mi oldei teiknodis langa detlot lowa blanga yu.

¹¹¹Detlot lowa blanga yu garra jidan olagijawan garram mi, jis laik mi kipumbat main ronwan ebrijing, en dei oldei meigim mi jidan brabli gudbinji.

¹¹²Aibin jinggabat blanga kipgon bulurrumbat detlot lowa blanga yu raidap mi dai.

¹¹³Ai nomo laigim detlot tufeis pipul hu nomo jidan trubalawei langa yu, bat mi, ai laigim ol yu lowa.

¹¹⁴Yu na tharran hu oldei maindimbat mi en kipumbat mi seifwan. Ai trastimbat yu wed.

¹¹⁵Yumob nogudbala pipul, yumob gowei brom mi. Ai garra teiknodis oni langa detlot lowa blanga main God.

¹¹⁶Meigim mi strongbala jis laik yubin pramisim mi, en ai garra jidan laibala. Nomo larram mi jidan nogudbinji wen mi weidabat blanga yu blanga seibum mi.

¹¹⁷Holdim mi en ai garra jidan seifwan, en ai garra teiknodis langa detlot lowa blanga yu olataim.

¹¹⁸Yu gibit bekboun langa detlot pipul hu nomo duwit langa detlot lowa blanga yu. Ola nogudbalawei blanga olabat nomo enijing.

¹¹⁹YAWEI, langa yu, ola nogudbala pipul jidan jis laik rabish. Blanga tharran na, ai laigim bulurrumbat ol yu lowa.

¹²⁰YAWEI, mi bradin langa yu en mi sheiksheik nomo lilbit dumaji yu det brabli haibalawan God en ai sabi hau yu jadjim pipul.

¹²¹Aibin dum wanim im rait en gudwan blanga dum. Nomo libum mi langa main enami olabat.

¹²²Yu pramis blanga album mi, yu wekinmen. Nomo larram detlot praudbala pipul dum krulwan ting langa mi.

¹²³Main ai dubala taid na brom lukinatbat wotaim yu garra seibum mi en meigim mi fri weya yubin pramisim mi.

¹²⁴Yu shoum mi yu kipgon laigimbat mi, yu wekinmen, en yu titjim mi ol yu lowa.

¹²⁵Mi wek blanga yu, YAWEI. Meigim mi sabi brabliwei wanim yu titjimbat mi.

¹²⁶YAWEI, im taim blanga yu blanga kaman en panishim ola pipul na, dumaji olabat nomo duwit langa detlot lowa blanga yu.

¹²⁷Trubala mi laigim brabliwei detlot lowa blanga yu. Olabat mowa gudwan den ola gudwan golwan ston.

¹²⁸Blanga tharran na ai bulurrum ol detlot lowa blanga yu. Ai nomo laigim ola nogudbalawei.

¹²⁹Ol yu lowa brabli gudwan. Mi teiknodis langa detlot lowa blanga yu brom insaid langa main hat.

¹³⁰YAWEI, yu wed im shoum pipul wanim blanga dum jis laiga lait langa dakbala pleis. Im meigim pipul sabi ebrijing brabliwei.

¹³¹Mi oldei wandim ol yu lowa olataim. Brabliwei na mi wandim olabat jis laik wen mi brabli thestibala blanga woda.

¹³²YAWEI, yu kaman en sori langa mi, seimwei laik yu oldei dum langa ol detlot pipul hu laigim yu.

¹³³Garram yu wed, yu album mi blanga wok langa yu wei, en nomo larram eni nogudbalawei jidan bos langa mi.

¹³⁴Yu seibum mi brom ol detlot pipul hu oldei dum nogudbala ting langa mi, wulijim ai garra teiknodis en duwit langa detlot lowa blanga yu.

¹³⁵Yu jidan gudbala langa mi YAWEI, en lenim mi blanga ol yu lowa.

¹³⁶Wen mi krai main tiyas randan jis laik weya riba randan, dumaji ola pipul nomo teiknodis langa ol yu lowa.

¹³⁷YAWEI, yu dum ebrijing raitwei, en ol yu lowa olabat gibit pipul feyago.

¹³⁸Detlot lowa weya yubin gibit, olabat gibit feyago raitwei.

¹³⁹Mi gitwail brabliwei laiga faiya weya im barn, dumaji main bedfren olabat nomo teiknodis langa ol yu lowa.

¹⁴⁰Blanga yu pramis im tok trubalawan. Mi laigim det pramis brabliwei.

¹⁴¹Mi nomo jidan haibala. Mi nomo enijing, en nobodi laigim mi, bat ai nomo fogedabat wanim yu titjimbat mi.

¹⁴²Det trubalawei blanga yu garra jidan olagijawan na. Yu lowa im oldei trubalawan.

¹⁴³Mi jidan garram loda trabul en mi jidan nogudbinjiwei, bat detlot lowa blanga yu meigim mi jidan brabli gudbinji.

¹⁴⁴Detlot lowa blanga yu gibit feyago olataim. Meigim mi sabi olabat, en ai garra jidan laibala.

¹⁴⁵Mi jingat langa yu garram ol main hat. YAWEI, ensim mi en ai garra duwit langa detlot lowa blanga yu.

¹⁴⁶Mi jingat langa yu, YAWEI. Yu seibum mi en ai garra kipum detlot lowa blanga yu.

¹⁴⁷Bifo det san gidap mi jingat langa yu blanga album mi. Mi jidan en weidabat langa yu pramis. Mi trastim langa yu wed.

¹⁴⁸Naitaim ai nomo silip, dumaji mi wandim jinggabat wanim yu oldei dalimbat mi.

¹⁴⁹YAWEI, yu irrim mi, dumaji yu filing blanga laigimbat im olagijawan. Yu sori langa mi en seibum main laif!

¹⁵⁰Detlot krulbala pipul kaminap gulijap na, ol detlot pipul na hu nomo bulurrum yu lowa.

¹⁵¹Bat yu jidan gulijap langa mi YAWEI. Det trubalawei blanga yu garra jidan olagijawan na. Yu lowa im oldei trubalawan.

¹⁵²Longtaim aibin len blanga detlot lowa blanga yu. Yubin meigim detlot lowa blanga jidan olagijawan.

¹⁵³YAWEI, luk langa ol main trabul en seibum mi, dumaji ai nomo bin fogedabat yu lowa.