Text copied!
CopyCompare
Gotena Epe Agaa - Ol Provep - Ol Provep 27

Ol Provep 27:3-27

Help us?
Click on verse(s) to share them!
3Maeyae aanuna kone epe-rupa naimi-pulu go imi koneme niaa kedaa adaa meda geme. Go epea kedaare ipa muna kedaa-para adaa aana lapome adea.
4Aa medaloma ratu yawoa wae pemenumi onaa yago kedaa adaapu pa mea kateme. Goa pea pare oyae epame omoa kone wae imi konemere ratu yawoa aa meda-para wae kone imi kone luabu rabuaaya.
5Waea pi aa meda maredepo rabu ne yago-rupa raana ome kone page kalo aaye.
6Nena adami aanumi nimu raba meainalo radaa ora waru mea geme palo peme. Pare mo nena yada-lore aanumi epea pua ne makira teme.
7Aa medame eta luabu noa pua nipuna robaa-para rubita raburi alubi apaa ora ota pare reame ome aame rero pi eta nea rabu ora mada nalia.
8Gore aa medame nipuna su ada gimoa pa pora pamu aaliare yaame nipuna piri-para gimoa pa riyaa pamuaya-rupa mada pamea.
9Waele-sada page ora epe wabala waele luabu pema raburi niaa mada ora epe ta kone sua pedo waru pema. Go page niaana adami aanumi niaa raana masaawa niaa rabameape kone imi epe agaa loa epea pemede-rupa mada yade.
10Nena ona nogo naakinu-para nena adami aanu masaa narilape. Go page wae yae medame ne epaa mulalo paliare gore ne rabamina nena ame na-adola pope. Aa meda ne raapu repara pirali-daare go ame su adaalu-para aaya page rabuniaaya.
11Naa naaki neme epe kone luabu mua epe pora luabu ratali-dare ne madaa epe kone salua. Goa pua aa medame nipara pa mariae agaa teadare neme nipuna agaa mada abutoa.
12Epe kone i aamere gore nipumi ora go-rupa makuaaya. Kedaa nipu mada epolalo palia-daare gore nipumi aipapulu mapakeaalia. Goa pea pare epe kone na-i aare gore mo pora wae i-para pea rabu page go wae yaeme nipu ora mea rabu ora aipapulu kedaa mu aaya.
13Aa medame mo aa yagona rudu neme abulalua loa wala naabutea-daare gore nipu wea aa yade. Go yapare mo nepara yaa agaa robali aame nepara rudu meda giaina tea rabu nipuna ta yaa agaa aba ade-ga neme mo rudu abuna kone sua oyae meda puri paboa meape.
14Gore neme rui puri pabo loa nena adami aa-para ribaa reko te-dare nipu-para wae agaa temede-rupa mada te.
15Aa medana ore agaa rado rado adaapu ne ona yaliare gore ada runane yai itipa-ta pogo pogo loatade-rupa mada pea.
16Goa pea-pulu nipuna aanimi go agaa kone luabu magimaape-rupa mada dia. Goa peare aame poripu page wabala pepenini page ripinaalua kone sua pemedea-pea.
17Nimumi puri pane aeyane nepo papere wala aeyane yagome nepo peme. Go peme-rupare aa yago medame mo aa yago rabamua epe kone masaaya.
18Aa medame repenana ini etalia rabu go repenana ini raloa nalua kone salia-dare go repena ora waru surubalia. Aa medame nipuna surube aa ora waru surubalia-daare go surube aame mo aa nipuna bi ora waru minasaalia.
19Aa medame mo ipa ini-para adainaalia raburi nipuna ini agaa nipuna bipa adea. Go-rupa aa medame nipuna pea rayo waru adoa rumaliare nipu gopiane aa yadelo makualia.
20Gore aa adaapu omalimi page pinawa. Mo aa tapa luabu mada narulatabalia. Go-rupa mada nipuna kone-para ia yae luabu mada napu kiritalia.
21Repena sulaame silipa golonu roa rakepeta. Go rupa mada go aa-re epe aa yade wae aa yade lo aba ademe. Epe aa yaliare nipuna bi minasaeme.
22Gore neme epe kone nai aa puri palo tali-dare omolalo palia-rabu nipuna maeyae kone mada nagimalia.
23Goa palia-ga nena mena sipsip-para meme mena luabu waru surubape.
24Gore akolo ya? Nena mone-re ne raapu oro yalo mada nasapiti. Mo aa mudu pia king-na ruru page oroyalo mada napitimi.
25Nena maapu-para ripu adaalu opalia-dare ponoa nena menanu nena mea sape. Goa pali rabu wala ripu kagaa opalia.
26Goa pua orope nena meme mena mada yoto mua su kabaina. Goa pua mo sipisipi mena iri pudi mua marape yae wariaina.
27Goa puare nena mo meme mena adu ipaa muare nena nogo naaki ona raapu nape ipaa meaina. Goa puare nena kagono onanu page mada kate.

Read Ol Provep 27Ol Provep 27
Compare Ol Provep 27:3-27Ol Provep 27:3-27