Numero 21:19-33

¹⁹Mamaʌba Najalield̶aa wãsid̶aa. Mamaʌba Bamod̶aa wãsid̶aa.

²⁰Mamaʌba jewed̶a Moab druad̶e b̶ʌd̶e jũẽne wãnaped̶a Pisga eyad̶e duanesid̶aa. Pisga eyad̶eba Jesimoʌ̃ ẽjũã põãsa ewaraga b̶ʌra unubaria.

²¹Maʌ̃be israelerãba amorreorã boro Sehoʌ̃ abadamaa ʌ̃cʌrʌ diabuesia nãwã jarad̶amãrẽã:

²²–Dai quĩrã djuburia bʌ druad̶e idu wãyã wãbidua. Dairãra bãrã néud̶e ed̶a wãnaẽ́a, bãrã uva ẽjũãne bid̶a ed̶a wãnaẽ́a, ni bãrã baido juebada uriad̶ebemada dod̶aẽ́a. Ẽberãrã Boro abada od̶e quĩrãipa wãnia.–

²³Baribʌrʌ Sehoʌ̃ba israelerãra idji druad̶e idu wãbiẽ́ basía. Idji sordaorãra jũma trʌ̃cuaped̶a ẽjũã põãsa ewaraga b̶ʌd̶e israelerãmaa wãnaped̶a Jahaza puru caita djõsid̶aa.

²⁴Baribʌrʌ israelerãba ãdjirãra poyad̶aped̶a ãdji druara jãrĩsid̶aa Arnoʌ̃ dod̶eba ab̶a Jabó dod̶aa amonitarã drua daucha. Amonitarãba ãdji druara bio waga eropanasid̶aa.

²⁵Israelerãba amorreorã puru b̶eada jũma poyasid̶aa; dji puru droma Hesboʌ̃ abadara, puru zaquerã sid̶a. Poyad̶aped̶a maʌ̃ purud̶e panesid̶aa.

²⁶Amorreorã boro Sehoʌ̃ra Hesboʌ̃ purud̶e b̶abadjia. Naẽna idjira moabitarã boro ume djõped̶a ãdji druara jũma jãrĩsia ab̶a Arnoʌ̃ do daucha.

²⁷Maʌ̃ carea nãwã jarabadaa: ¡Hesboʌ̃ purura wayacusa od̶e zed̶adua! Sehoʌ̃ purura idji b̶ad̶a quĩrãca bia od̶ia.

²⁸Sehoʌ̃ sordaorãra Hesboʌ̃ purud̶eba wãsid̶aa. Tʌbʌ urua eradrʌbʌrʌ quĩrãca Sehoʌ̃ purud̶eba wãsid̶aa. Maʌ̃ne Ar puru Moab druad̶e b̶ʌra babuesid̶aa. Arnoʌ̃ do icawa eyad̶e b̶ea puru sid̶a jũma babuesid̶aa.

²⁹¡Ay, moabitarã! ¡Bãrãra mĩã djuburi b̶eaa! Bãrã ãcõrẽ Quemo ẽpẽbadara beusid̶aa. Amorreorã boro Sehoʌ̃ba bãrã warrarãra memenebisia. Bãrã caurãra jida edesia.

³⁰Baribʌrʌ dadjirãba ãdjira jũma poyasid̶aa. Hesboʌ̃ purud̶eba ab̶a Diboʌ̃ purud̶aa jũma quenasid̶aa. Nopa purud̶eba ab̶a Medebá purud̶aa jũma ãrĩnaped̶a babuesid̶aa.

³¹Mãwã israelerãra amorreorã druad̶e panesid̶aa.

³²Maʌ̃ne Moiseba ʌ̃cʌrʌ diabuesia Jazer drua acʌd̶amãrẽã. Israelerãba puru maʌ̃ druad̶e b̶eara poyad̶aped̶a amorreorãra ãyã jʌretasid̶aa. Mama bid̶a israelerãra panesid̶aa.

³³Mamaʌba israelerãra Basaʌ̃naa wãbada od̶e wãsid̶aa. Maʌ̃ne Basaʌ̃nebema boro Og abadaba idji sordaorãda Edrei puru b̶ʌmaa edesia israelerã ume djõni carea.