NUMERA 22:5-18

⁵Taunabunai ia ese gwaukau taudia haida e siaidia, a Balaam Beoro dekenai, Petoro ai, Sinavai Badana isena ai, Amawa tanona ai, eto, A itaia, bese ta Aigupto amo vada ema, tano idoinai vada e hahonua davana; idia na lau vairagu ai vada e taruha.

⁶Mani emu kara aoma, ina bese ba uduguiraia, badina be edia goada ese lauegu e hereaiamu; bena readia baina hadareredia diba bona baina luludia diba; badina be lau dibagu oi ese o hanamoamu tauna na baine namo, bona oi ese o uduguiraiamu tauna na baine dika.

⁷Taunabunai, Moab lohiadia bona Midian lohiadia ese idume na imadia ai e abi, ela, Balaam enai e kau, Balak ena hereva e hamaorolaia.

⁸Bena Balaam ese e haere henidia, eto, Hari hanuaboi iniseni ai ba mahuta; bena Iehova ese baine hereva henigu heḡereḡerena ai baina haere henimui. Taunabunai, Moab lohiadia na Balaam dekenai e nohova.

⁹Bena Dirava na Balaam dekena ema, eto, Ini oi dekemu ai e nohomu taudia be daidia?

¹⁰Balaam ese Dirava e haere henia, eto, Balak Siporo, Moab pavapavana, vada e siaidia dekegu ai, eto,

¹¹O itaia, bese ta Aigupto amo vada ema, tano idoinai vada e hahonua davana; mani emu kara, ina bese ba uduguiraia, bena baina tuari henidia bona ina tano amo baina luludia lasi.

¹²Dirava ese Balaam e hamaoroa, eto, Idia ida basiola, bona una bese basio uduguiraia; badina be lau ese vada na hanamodia.

¹³Daba ai Balaam e tore isi, Balak ena lohia taudia e hamaorodia, eto, Emui tano ba lou henia, badina be Iehova ese e rugumu, basina bamomui e tomu.

¹⁴Taunabunai Moab lohiadia e lou ela, Balak dekenai, eto, Balaam na e gwau edeede, se bamomai.

¹⁵Taunabunai, Balak ese lohia haida ma e siaidia; e siaidia guna na dia hoho bona dagi maraḡi taudia, a harihari e siaidia na hoho bona dagi bada taudia.

¹⁶Idia na Balaam dekena ela, eto, Balak Siporo na e tomu, Ḡau ta basine laomu ahu, vada aoma.

¹⁷Lau ese baina matauraimu, bona ede ba hamaorogu toma unu mo baina kara toma. Taunabunai vada aoma, ina bese ba uduguiraia, egu noinoi heḡereḡerena.

¹⁸A Balaam ese Balak ena hesiai taudia e haere henidia, eto, Ena be Balak ese ena ruma, mai ena silver idoinai bona ena gold idoinai ida, bema henigu, to Iehova egu Dirava ena hahedua basinama ha-idaua diba; basinama hamaraḡia, basinamahabadaia danu.