MUKÉTÍMÙ 22:5-18

⁵Mɛm̀mɛ kɛ̀ Bɑdɑki dɛitɛ yɛtɔ̃rɛ̀ kɛ́tɔ̃ nho ɛì kótírì Petɔɔ dìì bo kukó nhEfɑdɑti borɛ̀, kɛ̀ yɛ̀ bo nɑ́kɛ́ Beɔɔ birɛ Bɑdɑmmu kɛ dɔ̀: Kubotí mɑkù kùù yɛ̀nní Esibiti kɛ mɔ́nkɛ pitírí kɛtenkɛ̀ kɛ bɑ̀tɛ́ diɛ nh ɛì mɑ̀nku kɛ n wetí.

⁶Dɛ kó kubotí kpeńnìmu kɛ m pɛ̃ɛ̃tɛ́, n dɑ bɑ́ɑ́mmu kɔtɛní kɛ́ bɛ̀ bɔntɛ́ kusĩ̀nkù kɛ̀ dɛ̀ nɑɑti m bɛ̀ nɑ. N yɛ̃́mu kɛ dò nkɑ̀ɑ yĩ wèè yɑ̀ mɛyɛi nhò ɔ̃ɔ̃ mɛ̀ yɑ̀mu. Kɑ̀ɑ yĩ wèè yɑ̀ mɛsɑ̀ɑ̀ nwèe mɛ̀ yɑ̀.

⁷Mɔɑbu ɛì kó bɛkótíbɛ̀ nɛ̀ Mɑndiyɑ̃ɑ̃ ɛì kɔbɛ kɛ̀ bɛ̀ɛ kɔtɛ kɛ́yɑ̀ Bɑdɑmmu kɛ tɔnɛ̀ ticuuti kɛ bo ò cu, kɛ́tuɔkoo kóò nɑ̀kɛ́ bɛ̀ tɔ tì timɔu.

⁸Kɛ̀ Bɑdɑmmuu bɛ̀ nɑ̀kɛ́ kɛ dɔ̀: Duɔ́nɛ̀, kɛ̀ dɛ̀ wentɛ́ n di nɑ́kɛ́ m beé nti Yiɛ̀ nKuyie nkɛ̀ kù n nɑ̀kɛ́ tì. Mɛm̀mɛ kɛ̀ Mɔɑbu ɛì kó bɛkótíbɛ̀ɛ yié nho cĩ́ɛ̃̀tɛ̀.

⁹Kɛ̀ Kuyie nkɔtɛní kɛ́bekɛ Bɑdɑmmu kɛ dɔ̀: Bɛnìtìbɛ̀ ɔ̃̀mbɛ bo ɑ cĩ́ɛ̃̀tɛ̀?

¹⁰Kɛ̀ Bɑdɑmmuu kù tɛ̃̀ńnɛ́ kɛ dɔ̀: Sipɔɔ birɛ Bɑdɑki Mɔɑbu ɛì kóo kpɑ̀ɑ̀tì weè bɛ̀ tɔ̃nní kɛ tú:

¹¹Kubotí mɑkù kuù yɛ̀nní Esibiti kɛ mɔ́nkɛ pitírí kɛtenkɛ̀, kòò tu kɛ̀ m bo yie n kɔtoo kɛ́ bɛ̀ bɔntɛ́ kusĩ̀nkù kɛ̀ dɛ̀ bo yie nwèe bɛ̀ nɑ kɛ́ bɛ̀ bɛ̀ti.

¹²Kɛ̀ Kuyie nhò nɑ̀kɛ́ kɛ dɔ̀: A bɑ́ɑ́ kɔtɛ, ɑ bɑ́ɑ́ bɛ̀ bɔntɛ́ kusĩ̀nkù, míì bɛ̀ dɔ̀ɔ̀ mɛsɑ̀ɑ̀.

¹³Kɛ̀ dɛ̀ɛ wentɛ́ kɛ̀ Bɑdɑmmuu bɛ̀ nɑ̀kɛ́ kɛ dɔ̀: Kònnɛ̀ di ciɛ, ti Yiɛ̀ nKuyie nyetɛmu kɛ tú m bɑ́ɑ́ di nɛinɛ̀.

¹⁴Kɛ̀ Mɔɑbu ɛì kó bɛkótíbɛ̀ɛ ítɛ́ kɛ́kò kɛ́nɑ́kɛ́ Bɑdɑki kɛ dɔ̀: Bɑdɑmmu yetɛmu kɛ tú ò bɑ́ɑ́ ti nɛinní.

¹⁵Kɛ̀ Bɑdɑkii yíɛ́ kɛ́tɔ̃ nkutɔ̃nkù dɛ́rínkù kɛ̀ kù nsũnɛ̀ kuketikù kɛ tú bɛnitidiɛbɛ̀ kɛ pɛ̃ɛ̃tɛ́ bɛketibɛ̀.

¹⁶Kɛ̀ bɛ̀ɛ tuɔkoo Bɑdɑmmu borɛ̀ kóò nɑ̀kɛ́ kɛ dɔ̀: Sipɔɔ birɛ Bɑdɑki weè ti tɔ̃nní kɛ tú ò dɑ bɑ́ɑ́mmu ɑ bɑ́ɑ́ yetɛ ɑ bo kɔtoomɛ̀ o borɛ̀.

¹⁷Ò tu ò yóó dɑ dɛ́úkùnnɛmu mɛdiɛ̀ nkɛ́dɔɔ̀ ɑ ò nɑ̀kɛ́ tìì kó dimɑ̀ɑ̀, ò tu ò dɑ bɑ́ɑ́mmu ɑ bɑ́ɑ́ yetɛ, ɑ́ kɔtoo kɛ́ bɛ̀ nhò bɔntɛ́ kusĩ̀nkù.

¹⁸Kɛ̀ Bɑdɑmmuu bɛ̀ tɛ̃̀ńnɛ́ kɛ dɔ̀: Bɑ́ kɛ̀ Bɑdɑki n duɔ́ nho cĩ́ɛ̃̀tɛ̀ kɛ̀ timɑ́tì pɛ́ítì tɛ̀ pìɛ́kɛ́ nɛ̀ mɛsɔɔ nyí yóó nɑ kɛ́dɔɔ̀ tìmɑtì kɛ̀ tì ndɛu yoo tì nkɛ̃ńnì kɛ́petɛnɛ̀ ti Yiɛ̀ nKuyie n tũ nkù bo n nɑ́kɛ́ tì.