NUMERA 15:3-16

³bena boromakau ta eiava mamoe ta ba hahelaḡaia Iehova ena, ḡole-oho boubouna eiava gwau-hamata boubouna eiava lalo-namo boubouna eiava aria ta boubouna, bonana namo ḡauna Iehova ena;

⁴una negana ai boubou baine heni tauna ese flaoa namo-hereana efa ta baine karoaia, karoa gwauta, karoa ta baine abia, bona dehoro hini ta baine karoaia, karoa hani, karoa ta baine abia; bena flaoa bona dehoro baine bulodia.

⁵Inuinu boubouna danu bavabia: vine ranuna hini ta ba karoaia, karoa hani, bena karoa ta ba heni; ḡole-oho ḡauna eiava gwau-hamata ḡauna eiava lalo-namo ḡauna ida.

⁶Eiava mamoe maruanena ta ba hahelaḡaia, flaoa namo-hereana efa ta ba karoaia, karoagwauta, bena karoa rua bavabi, bona dehoro hini ta ba karoaia, karoa toi, bena karoa ta bavabia; bena flaoa bona dehoro ba bulodia.

⁷Inuinu boubouna danu ba heni; vine ranuna hini ta ba karoaia, karoa toi, bena karoa ta bavabia, bonana namo ḡauna Iehova ena.

⁸Eiava boromakau maruanena ta bavabia heḡaeḡae, emu ḡole-oho boubouna eiava emu lalo-namo boubouna eiava emu gwau-hamata boubouna eiava emu herohemaino boubouna ai bahalaoa, Iehova ena;

⁹boromakau maruanena ida baine heni ḡaudia bini: flaoa namo-hereana efa ta baine karoaia, karoa gwauta, bena karoa toi baineabi, bona dehoro hini ta baine karoaia, karoa rua, bena karoa ta baine abia; bena flaoa bona dehoro baine bulodia.

¹⁰Inuinu boubouna danu ba heni: vine ranuna hini ta ba karoaia, karoa rua, bena karoa ta bavabia, lahi boubouna ai ba halaoa, bonana namo ḡauna Iehova ena.

¹¹Boromakau mamaruanedia ta ta ida, bona mamoe mamaruanedia ta ta ida, bona mamoe natudia mamaruanedia ta ta ida, bona nani natudia ta ta ida, unu ba heni toma.

¹²Mauri ḡaudia hida bavabidia heḡeḡae, unuhohodia mo unu ba heni toma.

¹³Israel taudia korikori na una dala amo bae ḡaukara, edia boubou ḡaudia lahi ai bae ato kau negadia ai; unu hetomana bonana namo ḡaudia ai baela, Iehova ena.

¹⁴Bona idau bese tauna eiava bogaragimui ai e noho hedoamu tauna, emui uru iboudiai lalodiai, baine ura bonana namo ḡauna lahi ai baine gabua Iehova ena, ia ese umui o karaiamu heḡereḡerena ma baine karaia.

¹⁵Emui hebou ai taravatu baine tamona, umui emui, bona idau tauna bogaragimui ai e noho hedoamu ena; taravatu tamona, baine mia hanaihanai taravatuna, emui uru iboudiai lalodiai. Umui bona noho-hedoa tauna na heḡereḡere, Iehova vairanai.

¹⁶Taravatu be tamona bona haheḡani be tamona, umui latamui ai bona bogaragimui ai e noho hedoamu tauna latanai.