Ʒare Biri 15:3-16

³I mumupaŋte erâ me buafec faio taha rârâe irec erâ me hombaŋ dameŋ‐ŋeŋicte erâ Wofuŋte maio âsu biaŋ fuaocte bulimakao me lama moc qowi bâzire biŋe rikeniŋmu hâcne.

⁴Ŋoŋe iŋuc ehuc taha bâzire wiac kecʒiŋuc ʒuhuckerâ râenʒepieŋ: Oto moc irecnec poroŋ uucne teŋkonec wâŋ wokemaŋ opâhec bâsifuckekicne.

⁵Erâ lama taha bâzire biŋe râeniŋmu sâc ine waiŋzi taha bâzi i fifia râqâc irecnec teŋkonec 4 irec sâc mâmâc râenʒepieŋ.

⁶Me lama ŋicne moc râeniŋmuo ine oto moc irec poroŋ uucne teŋkocne 2 wokemaŋ opâhec bâsifuckekicne i mâmâc râenʒepieŋ.

⁷Erâ waiŋzi taha bâzi ine fifia râqâc irecnec teŋkonec 3 râenʒepieŋ. Ŋoŋe iŋuc râepie Wofuŋte maio âsu biaŋ fuaocmu.

⁸Me bulimakao ŋicne moc qowi bâzire biŋe, me mumupaŋ‐ŋeŋiczi fârinehec eocte irec biŋe, me wama bâzire biŋe Wofuŋ rikecnezo murâ,

⁹ine oto moc irecnec poroŋ uucne teŋkonec 3 wokemaŋ opâhec bâsifuckekicne i mâmâc râenʒepieŋ.

¹⁰Erâ waiŋzi taha bâzi ine waiŋ fifia râqâc irecnec teŋkonec 5 râenʒepieŋ wâc. Wiac i sasawa rike râec epie Wofuŋte maio âsu biaŋ fuaocmu.

¹¹“Ŋoŋe bulimakao me lama ŋicne me lama â noniŋ motecne taha bâzire biŋe rikekuc iŋuc hâcne enʒepieŋ.

¹²Erâ qowi rike râec eniŋmu sâc ijaha wiac gâcne râenʒepieŋ.

¹³Mâreŋ rune ŋoŋe Wofuŋte maio âsu biaŋ fuaocte taha bâzi iŋuc hâcne rikenʒepieŋ.

¹⁴Me ŋic jabane moczi ŋondeŋ‐ŋeŋicko juocmu, me ŋic moczi ŋoŋehec raŋqa juwefuhuc Wofuŋte maio âsu biaŋ fuaocte taha bâzi rikezo murâ ine ŋoŋe eeŋgopieŋ ijaha ehuc rikezejec.

¹⁵Ŋic jabane ŋoŋehec jueŋgopieŋ â mâreŋ rune ŋoŋere dâŋsanaŋ i mocjaha erâ mimiŋzi ɋâric foŋare rahuc juzejec. Ŋoŋe mâmâc Wofuŋte maio sâc mocjaha erâ junʒepieŋ.

¹⁶Ŋic jabane ŋondeŋ‐ŋeŋicko jueŋgopieŋ â mâreŋ rune, ŋoŋere sâcmutâc â mumutâc dâŋ mocjaha foŋarezejec.”